Pituffik
Inatsisilerinermut ilisimatooq: Pituffik pillugu suliaq tamanit nuannarineqanngilaq
Pituffimmi kiffartuussinissamut isumaqatigiissummut qinnuteqarsimagaluarlutik itigartinneqarsimasut maalaaruteqaraluarunilluunniit eqqartuussivimmit taperserneqarnavianngitsut inatsisilerinermut ilisimatuup oqaatigaa. Danmarkimi Forsvars- og Aerospaceindustrien allatut isumaqarpoq
Pituffimmi kiffartuussinissamik isumaqatigiissuteqarnissamut suliffeqarfiit pingasut itigartinneqartut eqqartuussivikkoorlugu maalaaruteqarunik taperserneqannginnissaat naatsorsuutigineqarpoq. Illersornissamut suliaqartut Exelis Services kiffartuussinissamik isumaqatigiissuteqarfigineqarput oktobarimilu atuutilissalluni.
Copenhagen Business Schoolimi (CBS) professori Søren Friis Hansen pisoq pillugu ima allappoq:
- Suliffeqarfiit maalaaruteqartut eqqartuussivimmit taperserneqarsinnaanerat takujuminaatsippara. Amerikarmiummi suliffeqarfiata inatsisit atuuttut maleqqissaarpaat, Søren Friis Hansen Finansimut oqarpoq. Suliffeqarfiup Exelis Servicesip inatsisaasut malillugit ingerlatsisut oqaatigaa, naak amerikarmiunit suliffeqarfik pigineqaraluartoq Danmarkimi aamma allaffeqarfeqarnera pissutaalluni inatsisaasut malinneqartut nassuiaatigaa.
Forsvars- og Aerospaceindustrien neriulluarpoq
Dansk Industrimit (DI) suliaq allatut isigineqarpoq.
- Inatsisit pillugit suliat ilisimatusarnerunngillat. Allatut isumaqartoqarsinnaavoq, Forsvars- og Aerospaceindustrienimi DI-p ataaniittumi pisortaq Frank Bill oqarpoq.
- Isumaqatigiissutigineqartut amerikarmiunit atuutsinneqarput, pisortaq Finansimutoqarpoq.
Suliffeqarfiit pingasut, Greenland Contractors ilanngullugu, USA-mi eqqartuussivimmut aalajangiineq maalaarutaat februaarip 20-ani suliarineqassaaq.
Ameriarmiut suliffeqarfiat Vectrus Pituffimmi kiffartuussinissamik isumaqatigiissut tigussavaa oktobarimi. Greenland Contractorsip Pituffimmi sulineq ingerlatarigaluarpaa.