tusarniaaneq

Inatsiseqarnermi suliassaqarfiit akisussaaffigilerneqassapput

Sara Olsvigip inatsiseqarnermut suliassaqarfiup akisussaaffigilernissaa anguniarpaa. Kisianni pitsaassusaata danskit naligileqqaartaariaqarpaa.

Eqqartuussiviit, politiit aamma pinerluttunut isumaginnittoqarfik siunissami Danmarkimiunngitsoq Kalaallit Nunaannit aqunneqalissapput. Naalakkersuisut tamanna anguniarpaat.

- Siunissaq eqqarsaatigalugu inatsiseqarnermut suliassaqarfiit akisussaaffigilerusuppagut, isumaginninnermut inatsisinillu atuutsitsinermut naalakkersuisoq, Sara Olsvig (IA) ullumi eqqartuussiveqarnermut ataatsimiititaliap Nunatsinnullu tunngasunut ataatsimiititaliap ataatsimoorlutik aaqqissugaanik tusarniaasoqarnerani naqissusiivoq.

Atuaruk: Inatsisinut atuutsitsinermi suli ajornartorsiuterpassuaqartoq

- Danskit assigipajaarlugu pitsaassuseqalernissaa qulakkeerneqassaaq, naalakkersuisoq naqissusiivoq, namminersornermut inatsisip aalajangersagaanut, Naalagaaffiup akisussaaffiit Danmarkimi pitsaassutsit assigilerpagit aatsaat akisussaaffigilerneqartarnissaanut qulakkeeqqaartarnissaanut aalajangersakkanut unnersuussiutigaluni.

Atuaruk: Innuttaasunut akuulersitseqqittarneq iluatsinneq ajorpoq

Tusarniaanermi taamaattoqarnissaa sioqqullugu poltiinut, eqqartuussisoqarfimmut aamma pinerluttunik isumaginnittoqarfimmi ajornartorsiuterpassuit iluarsineqaqqaartariaqartut ersarinnerulerpoq.

Danskit inatsiseqarnermut ministeriata Søren Pape Poulsenip (K) tamarmik ataatsikkut aaqqiissuteqarfigineqarsinnaanngitsut naqissuserpaa. Taarsiullugu suliassaq qanoq tulleriaarneqarsinnaanersut Naalakkersuisullu oqaloqatigiissutiginiarpai.

Powered by Labrador CMS