Politiit amigartut
Inatsiseqarneq sakkortuumik sumiginnagaavoq
Nunaqarfiit illoqarfiillu amerlavallaartut politeeqaratillu kommunefogedeqanngillat. Tamanna peqatigalugu suliassat amerliartuinnarput
Nunatsinni inatsisit atortinneqarnerat ukiorpassuarni salliutinneqarsimanngilaq. Maanna tamanna aaqqinneqartariaqarpoq, nunarsuarmiullu paasisuuppassuk nunatsinni nunaqarfinni illoqarfinnilu qanoq innersoq, Danmarki sakkortuumik uparuarneqassagaluarpoq.
Taamatut oqarpoq folketingimut ilaasortaq Aleqa Hammond (S), taassumalu marlunngorpat inatsisinik atortitsinermut ministeri Søren Pind (V) ataatsimeeqatigissavaa.
– Kalaallit Nunaanni inatsisit atortinneqarfiat ukiut 50-it sinneqartuni salliutinneqarsimanngillat. Kalaallit Nunaanni nunaqarfiit amerlanerit kommunefogedeqanngillat. Taamaattoqarnera toqqissisimannginnermik, avinngarusimasumiinnertut kisimiittutullu misigititsisinnaasarpoq, Aleqa Hammond oqarpoq, taassumalu oktobarip arfernanni Folketingip ammarnissaa qilanaaraa.
Politiit artorsartut
Taassuma aamma Kalaallit Nunaanni politimesteri Bjørn Tegner Bay, politiinut isumaqatigiissutissaq pillugu ataatsimeeqatigissavaa.
– Politiit kisitsisinik ineriartornermut tunngasunik saqqummiussipput, tassanilu pinerlunniartarnerup appariartornera takuneqarsinnaavoq, tamannalu politiit ikilinerannik kinguneqassaaq. Kisitsisilli Kalaallit Nunaannut tunngasortaqanngillat. Taamaattumik ernummatigaara kalaallit Nunaanni politiit atugaasa ajornerulernissaat, maannami aamma sivisuvallaartumik uninnganikunik suliassarpassuaqaratta. Aamma politiinik artorsartunik sulisoqarpugut, aammalu pinerlunnermut kisitsisit Danmarkimut sanilliullugit qaffakkaluttuinnarlutik. Taamaammat politiit pillugit isumaqatigiinniarnissami taakku Kalaallit Nunaanni pissutsinut tulluarsarneqarnissaat pillugu inatsisinik atortitsinermut ministeri oqaloqatiginiarpara.
Oqaluttuaq tamaat Sermitsiami nutaami atuaruk, taannalu pisiarisinnaavat uani: