Aleqap atornerluinera
Inatsisartut siulittaasuat: Siusinnerpaamik novembarip 28-ani qinersisoqassaaq
Inatsisartut sapaatip akunnerani uani ataatsimiinnissaat kinguartipput
Naalakkersuisut siulittaasuat marlunngorpat qinersinissamik suaaruteqassappat siusinnerpaamik novembarip 28-ani Inatsisartunut qinersisoqassaaq.
Inatsisartut ukiaanerani ataatsimiinnerat ullumi pingasunngornermi ingerlaqqittussaagaluarpoq nalunaaqutaq 13.00-mit. Ataatsimiinnissalli marlunngorpamut kinguartinneqarput. Naalakkersuisut qinnuteqaataat Inatsisartut Allaffeqarfiannit akuerineqarpoq pingasunngornerup ualinerani.
- Sapaatip akunnera una Inatsisartut ataatsimeeqqissanngillat. Ataatsimiinnissaagaluit sapaatip akunnerata tullianut kinguartipput, Inatsisartut siulittaasuat Lars-Emil Johansen nalunaaruteqarpoq. Taamaasilluni nalunaarutigaa Inatsisartut oktobarip arfineq aappaanni ataatsimiinnerat ingerlateqqinneqarnissaat.
Nunatta karsiani aningaasat atornerlunneqarsimasut pillugit Inatsisartut pingasunngornermi ataatsimiittussaagaluarput.
Siumut Inuit Ataqatigiinnik suleqateqarnissamik isumaqatiginninniaraluartoq Inuit Ataqatigiinnit itigartinneqarput.
Inatsisartunut qinersinissaq aatsaat marlunngorpat suaarutigineqarsinnaavoq. Imaassinnaasorli Inatsisartuni ilaasortat immikkut ittumik qaaqquneqartut, Lars-Emil Johansenip oqaatigaa. Qinersinissamik suaaruteqareernermi sapaatit akunneri arfinilli qaangiuttut qinersisoqartarpoq. Siumumi qanoq oqallittoqarnersoq Lars-Emil Johansen akoorusunngilaq.
- Inatsisartut siulittaasuatut kisimi oqaaseqarsinnaavunga. Siumut nutaamik siulittaasortaassanersoq pillugu Siumumi siulersuisut aperisinnaavatit. Aamma Inatsisartunut qinigassanngortissinnaanngilanga suli, ilami suli qinersinissamik suaaruteqartoqanngilaq, Lars-Emil Johansen oqarpoq.
2015-mut aningaasanut inatsit utaqqiisaagallartoq isummerfigineqartussaasoq oqaatigaa. Tamanna ulluni qaninnerni marlunngorpalluunniit oqallisigineqassaaq.