Inatsisartut
Inatsisartut inissitsiternerminnut ataatsimiinneranni silarlussaaq
Nuummi tallimanngornerup ullaani sakkortuumik anorlissaaq
Pisarneq malillugu Inatsisartuni ilaasortaasut ataatsimiittarfimmut pisoqatigiissapput, Inatsisartut inissitsiternerminnut atatillugu ataatsimiilerpata ullumi tallimanngornermi. Pisoqatigiinnissarli amerlasuunut nuannerpallaarnavianngilaq, Nuummi silarluppoq.
Nuuk tallimanngornermi anorlerpoq, sisamanngormalli anorlernera sakkortusiartorluni. Aamma aqquserngit quatsersimapput.
Hans Egedep Illuani Inatsisartuni ilaasortaalersut naapeqatigiissapput nalunaaqutaq 09.00, tassani kaffisoqatigiissapput. Annaassisitta Oqaluffiani naalagiaqatigiissapput nalunaaqutaq 10.00, inissitsiterinissamullu atatillugu ataatsimiinneq nalunaaqutaq 11.00 aallartissaaq.
Lars-Emil Johansen Inatsisartuni siulittaasussatut innersuunneqaqqissasoq Siumumi siulittaasoq aamma Naalakkersuisunut siulittaasunngortussaq Kim Kielsen pingasunngornermi tusagassiortunut katersortitsinermi oqarpoq.
Perluk silarlullu sineriak tamakkerlugu ulluni makkunani atuuttoq Air Greenlandip tallimanngornermi timmisartuussinissaanut sunniuteqartoq Sermitsiaq.AG-mit sisamanngornermi allaaserineqarpoq. Nunatsinni timmisartuussinissat arlallit aamma Airbusip Danmarkimut uterinissaa arfininngornermut sila peqqutaalluni kinguartinneqarput.