Ataatsimiinneq

Inatsisartut immikkoortut arfinillit ullumikkut oqaluuserissavaat

Ullut ataatsimiiffiusut sisamaat Inatsisartut upernaakkut ataatsimiinneranni ullumikkut pissaaq

Inatsisartut upernaakkut ataatsimiinnermi marlunngornermi immikkoortut tallimat suliarissavaat.

Isumaginninnermut naalakkersuisup Sara Olsvigip (IA) inuit innarluutillit illersuisuannik atorfinitsitsisoqarnissaanik siunnersuutini saqqummiutissavaa.

Ullormi immikkoortut aappaat inissianut tunngavoq. Sulisut inissiat attartukkatik sukkanerusumik nalinginnaasumik attartukkatut tigusinnaanngornissaannut, Naalakkersuisut tassani allannguiniarput. Attartortut suliffimminnit inissiaq ukiut tallimat qaangiukkaangata tigusinnaanngornissaat siunnersuutaavoq.

Ullormi ataatsimiiffiusumi immikkoortut pingajuat Inatsisartut Ombudmandiannut tunngavoq. Inatsisartunut qinersisoqarnerata kingorna Inatsisartut Ombudsmandimik toqqaasarnissaat siunnersuutaavoq.

Aningaasaqarnermut akileraartarnermullu naalakkersuisup Aqqaluaq B. Egedep 2016-imut Ilassutissatut aningaasaliissutinut Inatsisissatut Siunnersuut saqqummiutissavaa. Taanna aamma Akileraaruserinermik ingerlatsineq pillugu Inatsisartut inatsisaata allanngortinneqarnissaanik saqqummiussaqassaaq.

Ullormi immikkoortoq kingullermi ataatsimiinneq matoqqasuussaaq. Siunnersuisoqatigiinut aalajangiisartutullu ataatsimiititalianut ilaasortassanik sinniisussaannillu qinersisoqassaaq.

Powered by Labrador CMS