illorsualiulersut
Inatsisartut imaattumik ataatsimiittarfittaassappat?
Inatsisartuni amerlanerussuteqartut taperserpaat Inatsisartut ataatsimiittarfissaannik nutaamik sananissaq
Inatsisartut illorsuarmut nutaamut ukiut sisamat qaangiuppata isertitsissapput. Nutaamik 3.000 kvadratmeterimik illorsualiornissaq 175 millioner koruuninik akeqassaaq.
Inatsisartut illorsuat ullumikkut atuuttoq pisoqalisoq iluarsaanneqassappat ikinnerpaamik 90 millioner koruuninik akeqassaaq. Taamaammat Inatsisartut siulittaasoqarfiat siunnersuuteqarpoq nutaarluinnarmik illorsualiortoqassasoq.
Marloriaammik angissusilik
Siunnersuut Inatsisartuni amerlanerussuteqartunit tapersersorneqarpoq illorsuarmik takorannersumik kinguneqassalluni.
- Tassunga atatillugu pingaaruteqartuuvoq Inatsisartut illussaat tassaasariaqarmat uagut
Kalaallit Nunaanni ataatsimoorussatsinnik tulluusimaarutigisassarput. Taanna ilutigalugu
illuliap attaveqarfitsinnut nittarsaataassaaq kalaallit kulturiata immikkuullarissuunera, Naalakkersuisut siunnersuummut akissuteqaamminni allapput.
Inatsisartut ullumikkut ataatsimiittarfimmit anginerungaartumik ataatsimiittarfeqalissapput. Ataatsimiittarfissaq 240 kvadratmeteriussangatinneqarpoq ullumikkut ataatsimiittarfimmit marloriaataa sinnerlugu anginerussalluni.
Tassani Inatsisartuni ilaasortanut 39-nut inissaqassaaq aammalu atorfilittat issiavissaat allaffittallit aqqaneq marluk ilanngunneqassallutik.
Namminersortup attartortissavaa
Inatsisartut siulittaasoqarfiata siunnersuutigaa sanaartornermik sulialimmik namminersortumik isumaqatigiissuteqarnikkut Inatsisartut illorsuassaat attartorneqarallassasoq sanaartornermilu aningaasartuutit sanaartortup nammineerluni aallaqqaammut matussutissarsissagai. Inatsisartut sanaartortorlu atorunnaarsinneqarsinnaanngitsumik ukiuni 20-ni atuuttussamik attartornissamik isumaqatigiissuteqassapput. Eqqarsaataavoq ukiut 30-it qaangiunneranni illorsuaq Inatsisartunut tunniunneqarsinnaassasoq akeqanngitsumik imaluunniit aki siumut isumaqatigiissutaareersoq malillugu.
Taamaattumik Inatsisartut naliliipput illorsuassaq aningaasanut inatsimmut artukkersuutaassanngitsoq.
Illussanik titartaasartunik unammisitsisoqassaaq Inatsisartullu illorsuassaannik sananeq ukiunik sisamanik sivisussuseqassangatinneqarpoq.
Inatsisartut ataatsimiittarfittaarnissaannik eqqarsaat siusinnersukkut qaqilerneqarnikuuvoq. Tamanna tunngavigalugu illussanik titartaasartoq Peter Barfoed Tegnestuen Nuummeersoq titartaasimavoq uunga allaaserisamut assitaliunneqartumik.