Nuuk
Inatsisartut ataatsimiittarfittaassaat pillugu Nuummiut taasitinneqassapput
Nuummi taasititsinermi innuttaasut 16-inik ukioqalereersimasut Inatsisartut ataatsimiittarfissaata sumi inissisimanissaanut taasitinneqassapput
Inatsisartut ataatsimiittarfissaata sumi inissisimanissaa taasissutigineqassaaq. Sumiiffiit pingasut aalajangersimasut taaneqarsinnaassapput. Ataatsimiittarfissaq minnerpaamik 3.000 kvadratmeterisut angitigissaaq 175 million koruuninillu akeqassalluni. Innuttaasut taasitinneqarnissaat Kommuneqarfik Sermersuup borgmesteriata Asii Chemnitz Narupip Inuit Ataqatigiinneersup aalajangigaraa.
Inatsisartut ukioq kingulleq ataatsimeeqatigiinneranni aalajangerneqarpoq nutaamik ataatsimiittarfittaassasut. Maannakkut ataatsimiittarfigisaat suliassarujussuuvoq, taamaattumik nutaamik sanasoqarnissaa aalajangerneqarpoq, ataatsimiittarfissarlu maannakkumit marloriaammik anginerussalluni.
Sumiinnissaa
Inatsisartut ataatsimiittarfissaat sumi inissisimassanersoq sumiiffiit pingasut toqqarneqarput. Nuutoqaq, Aneersuartarfik Aqqaluk aamma Arsiffik toqqagassaapput. Innuttaasunik taasititsineq aggustip 22-aniit 31-iata tungaanut internettikkut ingerlanneqassaaq. Nuummi innuttaasut 16-inik ukioqalereersimasut tamarmik peqataasinnaapput. Internetteqanngitsut eqqarsaatigalugit, Kommuneqarfiup Allaffiani Innuttaasunut Sullissivimmit taasisoqarsinnaavoq.
- Innuttaasut tusarniarneqarnissaat kissaatigaara. Taamaaliornikkut innuttaasut sunik kissaateqarnersut pillugit kommunalbestyrelsimut aqqutissiuussisoqarsinnaavoq, Kommuneqarfik Sermersuumi borgmesteri Asii Chemnitz Narup oqarpoq.
Inatsisartut nutaamik ataatsimiittarfittaarnissaannik sananissaq tapersersorpaa.
- Isumaqarpunga Nuuk illorsuarmik illoqarfiit pingaarnersaaneranik ersersitsilluartumik peqartariaqartoq, taamaattumik inissisimaffissaa pingaarutilerujussuuvoq, Asii Chemnitz Narup oqarpoq.