Inatsisartut
Inatsisartut ataatsimiittarfittaassaanut aningaasartuutissat misissuiffigineqarnissaa taperserneqartoq
Inatsisartut ataatsimiittarfittaarnissaanut pilersaarut taamaatinneqassanngilaq. Taamaattoq naatsorsueqqissaartoqassaaq, Inatsisartuni amerlanerussuteqartut taama isumaqarput.
Inatsisartut siulittaasoqarfiata Inatsisartut ataatsimiittarfittaassaanik piviusorsiortumik pilersaarummik siunnersuummik suliaqarnissaa, Inatsisartuni ilaasortat 18-nit akueraat.
Sisamat akerliullutik taasipput.
Akileraartarnermut aningaasaqarnermullu ataatsimiititaliap, sanaartornissaq 100 – 190 mio koruunit missaani akeqartussaq ingerlaannaq taperserneqarumanngitsoq allaaserisimavarput.
Aamma atuaruk: Inatsisartut ataatsimittarfittaassaat kinguartinneqartoq
Ataatsimiititaliap piumasaraa piviusorsiortumik pilersaarummut siunnersuuteqartoqassasoq aammalu sanaartungaareersunut ilanngunneqarpat ataatsimut qanoq aningaasartuutigineqassanersoq.
Siunnersuulli taanna amerlanerussuteqartunit taperserneqarpoq.
Demokraatit Partii Naleqqallu ataatsimiittarfittaaliortoqarnissaa akerleralugu nalunaarutigiuarsimavaat.
Aningaasat suliassanut allanut atorneqarnissaat silatusaarnerunerussasoq partiit taakku isumaqarput.