Inatsisartut aalajangiinissaminnut ullunik 26-nik piffissaqarput

IA isumaqarpoq tamat oqartussaaqataanerannut malittarisassat Naalakkersuisut paasisimanngikkaat

Inuit qinigaat ullunik 26-iinnarnik piffissaqarput uranimut politikki pillugu nalunaarusiap isummerfiginissaanut. Tamanna sivikippallaaqaaq, Inuusuttut Ataqatigiit isumaqarput.

Uranimut akuersaannginnerup atorunnaarsinnissaanik Inatsisartut aalajangiinissaannut Naalakkersuisut ullunik 26-iinnarnik piffissaliipput.
Tamanna sivikippallaaqqaaq, Inuusuttut Ataqatigiit isumaqarput, taakkualu tusagassiorfinnut nalunaarutikkut oqarput tamat oqartussaaqataanerannik malittarisassat Naalakkersuisut paasisimanngikkaat:
– 2012-imi ukiakkut ataatsimiinnermi Inatsisartut aalajangiinerat tunuliaqutaralugu urani pillugu sumulluunniit attuumassuteqanngitsut nalunaarusiaat Naalakkersuisut nittartagaanni nanoq.gl-imi septembarip 12-anni kiisami tamanut saqqummiunneqarpoq. Nalunaarusiami, kalaallisut 91-inik quppernilimmi, pineqarpoq uranimut akuersaannginnerup atorunnaarsinneqarnissaa imaluunniit allanngortinneqarnissaa. Naalakkersuisut naapertorlugit akuerineqarsinnaavoq inuit qinigaat ullunik 26-iinnarnik piffissalerneqarnissaat, uranimut akuersaannginnerup atorunnaarsinnissaanut aalajangiinissaannut.
Periuseq tamanna Inuusuttut Ataqatigiit paasivaat tamat oqartussaaqataanerannik malittarisassat Naalakkersuisut paasisimanngikkaat.
– Taamaattumik Naalakkersuisut sakkortuumik kajumissaassavagut akuersaannginnerup atorunnaarsinneqarnissaata oktobarip 8-anni oqaluuserineqarnissaa peeqqullugu, tassa Inatsisartut suli nalunaarusiaq oqaluuserisimanngimmassuk nalilersimanngimmassullu, Inuusuttut Ataqatigiit allapput.

Powered by Labrador CMS