Inatsisartunut qinersineq: Hans Enoksenip siusissukkut qinersinissaq pakatsissutigaa

- Inatsisartut upernaakkut ataatsimiinnissaanni pingaarutilinnik suliassaqaraluarpoq, kisianni taakku nangittussaajunnaarpagut. Taamaattumik qinersinissap nalunaarutigineqarnera pakatsissutigisorujussuuara.

Naalakkersuisuni siulittaasup Kim Kielsenip Inatsisartunut qinersisoqarnissaa ataasinngornermi nalunaarutiginerata kingorna, Partii Naleqqami siulittaasoq Hans Enoksen Sermitsiaq.AG-mut taama oqarpoq.

Aalisarnermut inatsisip piareerneqarnissaa qilanaarisimagaluaraa
Aalisarnermut inatsisissap uani qinigaaffimmi piareerneqannginnera, Hans Enoksenip ingammik uggoraa.

- Maanna aalisarnermut inatsisip naammassillugu suliarinninneq tamarmi kivivoq, aallaqqaataaniillu aallartissaagut. Sammisallu allat, soorlu attaveqaqatigiinnermi unammilligassat aamma mittarfiliornissat upernaakkut ataatsimiinnermi oqallisigineqartussaagaluarput. Siumup sammisat tamakkua pingaarutilittut isigimmagit, maanna qinersinissamik nalunaaruteqartoqarnera tupigusuutigaara, Partii Naleqqap siulittaasua erseqqissaavoq, taassuma upernaakkut ataatsimiinnerup kingorna qinersisoqarnissaa neriuutigisimagaluarpaa.

Namminiilivinissaq qineqqusaarutigineqassasoq
Hans Enoksenili qineqqusaarnissamut piareersimavoq. Partiip qineqqusaarutissat samminiarai oqaatigaa:

- Namminiilivinnissaq, aalisarneq, ineqarnermut akiliutit aamma inuuniarnermut aningaasartuutit appasinnerusut, kiisalu kalaallit sulisinnaasut inuussutissarsiortullu nukittorsarneqarnissaat, taanna oqarpoq.

- Partii Nunatta Qitornaanut taasinernik annaasaqaratarsinnaava?

- Partiit tamarmik eqqorneqassapput, Hans Enoksen akissuteqarpoq.

Siumumik aamma Inuit Ataqatigiit suleqatiginerat pitsaasuusimasoq, taanna oqarpoq.

- Sammisani tamani isumaqatigiittanngilagut, kisianni suleqatigiinneq pitsaavoq. Kisianni suleqatigiinneq nanginneqassanersoq qinersisartut aalajangissavaat, Hans Enoksen oqarpoq.