aatsitassat
Inatsisartuni amerlanerussuteqartut nipaatsut uranimut siunnersuutit itigartippaat
Steen Lyngep (A) aamma Inuit Ataqatigiit siunneersuutaat partiinit naalakkersuisoqatigiinnit itigartinneqarput
Uranimik piiaanissamut tunngatillugu innuttaasut taasitinneqarnissaannut Steen Lyngep (A) aamma Inuit Ataqatigiit siunnersuutaat, Inatsisartut tallimanngornermi taasiffigimmatigit tupaallannartoqanngilaq.
Tassami taakku siunnersuutit marluk Inatsisartunit amerlanerussuteqartunit itigartinneqarput. Siunnersuutit Inatsisartut aappassaaneerpaat, taakku aamma siullermeerneqarneranni taperserneqarnerat naammanngilaq.
Uranip piiarneqartup qummut killilerneqarnissaanut Steen Lyngep siunnersuutaa marlunnik taperserneqarpoq, 13-inillu akerlilerneqarluni, arfineq-pingasullu taasinngillat.
Nipaanneq tupigusuutigigaat
Naalakkersuisut illuinnaasiunngitsumik urani pillugu paasititsiniaanermik aallartitsinissaannik aammalu innuttaasut taasitinneqarnissaannik Inuit Ataqatigiit siunnersuutaat, qulingiluanit taperserneqarpoq, 13-inillu itigartinneqarluni.
Partiit illuatungiliuttut (Inuit Ataqatigiit, Partii Naleraq kiisalu attaviitsup Naaja Nathanielsenip) tupigusuutigaat, sooq partiit naalakkersuisoqatigiit (Siumut, Atassut aamma Demokraatit) sammisamut taama pingaartigisumut nipaatsiginersut.
Partiilli naalakkersuisoqatigiinniittut nikisitassaanngillat. Ataasiaannarluunniit siunnersuutinut sooq itigartitsinerlutik nassuiaateqanngillat.