Inatsisartuni amerlanerussuteqartut Doris naalakkersuisutut uppisikkusuppaat
Demokraatit Doris J. Jensenimut tatiginnikkunnaarput, taamaammallu Inatsisartuni tatiginninnginnermut taasititsisoqassappat Demokraatit inatsisartunut ilaasortaatitaat tamarmiullutik tatiginninnginnermut akuerseqataaniarlutik.
Inatsisartuni partiit amerlanerussuteqartut naalakkersuisumut Doris J. Jensenimut tatiginnikkunnaarput.
Tassami Naalakkersuisooqatigiinnut tapersersuisut Demokraatit maanna Doris J. Jensenimut tatiginnikkunnaarput. Doris J. Jensenimut tatiginninnginnermik taasisoqassappat, Demokraatit tatiginninnginnermut akuerseqataaniarlutik ilisimatitsipput. IA tatiginninnginnermik taasititsinissamik saqqummiussaqarniarpoq, tamannalu Partii Naleqqamit aamma tapersersorneqarpoq.
- Matumuunga Demokraatiniik nalunaarutingaarput Naalakkersuisut Siulittaasuat Kim Kielsen nalunaarfigeqqammerlugu Doris Jakobsen Jensen naalakkersuisutut ingerlaannarsinnaanera tapersersorsinnaanagu. Taamaammallu inatsisartuni tatiginninnginnermut taasititsisoqassappat nalunaarutigereersinnaavarput Demokraatit inatsisartunut ilaasortaatitaat tamarmiullutik tatiginninnginnermut akuerseqataaniarlutik, Demokraatini siulittaasoq Niels Thomsen tusagassiutinut nalunaarummi allappoq.
- Demokraatini isumaqarpugut qinikkatut inissisimasut tamaqqinnaatta pisussaaffigigipput inuiaqatigiit tatiginninnerat eriagalugu atussallugu, tamatumani aamma inuiaqatigiit aningaasaataannik ileqqorissaartumik atortassallugit. Uani pineqartumi Demokraatini isumaqarpugut Naalakkersuisunut ilaasortaq Doris Jacobsen Jensen qinikkatut inissisimasutut ileqqorissaarnissamut naatsorsuutigineqartut qaangerujussuarlugit pissusilersorsimasoq, Niels Thomsen oqarpoq.
Taamaasilluni Inatsisartuni partiit pingasut Doris J. Jensenimut tatiginninnginnermik taasiniarput. Suliaq kingusinnerpaamik novembarip 27-ani Inatsisartuni qaqilerneqassaaq.
Kim Kielsenip qanoq aalajangernissaa tullinnguuppoq, tassami Inatsisartuni amerlanerussuteqartut Doris J. Jensenimut tatiginninngillat.
Doris J. Jensen naalakkersuisutut nammineerluni tunuarniuteqarsinnaavoq, imaluunniit Kim Kielsenip naalakkersuisutut soraarsisinnaavaa.