imminut toquttarneq

Imminut toquttartut isumakulunnartumik amerleriartut

Ukiup siulianut sanilliullugu imminut toquttut malunnaatilimmi amerleriarput, kisitsisit politiit saqqummiuteqqammisaasa takutippaat. ''Isumakulunnartoq'', pinaveersaartitsinermut siunnersorti naqissusiivoq

Nunatsinni imminut toquttartut suli amerlapput, politiit kisitsisaataasa saqqummiunneqaqqammersut takutippaat. Assi toqqorsivimmit

2016-imi kalaallit 47-t imminut toqupput, taakku ukiumut siulianut sanilliullugit qulinik amerlanerupput.

Angutit 35-t imminut toqukkamik amerlanerupput, arnallu aqqaneq-marluupput.

Ukiuni kingullerni oqartussat pinaveersaartitsinermik aallartitsinikuupput, 9.-10. klassinut aamma meeqqanik inuusuttunillu sullitaqartunut siunertaqartumik.

Taamatut iliuuseqartoqaraluartoq, inuit inuusuttut imminut toquttartut kisitsisit takutippaat.

2016-imi quliniik 30-nik ukiulinni 26-t imminnut toqupput, taakkulu kisitsisit tamakkiisut affaraat. 2015-imi ukioqatigiiaani taakkunani 22-iupput.

- Imminut toquttartut inuusussiartuinnarnerat isumakulunnartorujussuuvoq, Kommuneqarfik Sermersuumi peqqinnermut pinaveersaartitsinermullu immikkoortortami imminut toquttarneq pillugu pinaveersaartitsinermut siunnersorti, Kristian Rosing oqarpoq.

- Maanna pikkorissartitsinermut atortut 2000-meersut nalilersoqqinnissaat aallartinnialerparput, siunnersorti ilisimatitsivoq.

Pikkorissarnerit ilaatigut ajortoqannginnerani misigissutsit oqaasertalernerusalernissaannik siunertaqartut nassuiarpaa.

- Kalaallit misigissutsinik toqqortuinatik qanigisaminnut oqaluuserinerusariaqarpaat. Pikkorissaasarnitsinni siunertat ilagaat, Kristian Rosing oqarpoq.

Atuaruk: Kim: Ukiut tamarmik meeqqat ukiorisariaqaraluarpaat

Imminut toquttartut amerlassusaat ukiumiit ukiumut 35-t 55-illu akornanni allanngorartarput. 1987-imi imminut toquttut 69-iupput, taakkulu piffissami nutaajunerusumi amerlanerpaapput.

Powered by Labrador CMS