pinaveersaartitsineq
Imminut toquttartut amerlassusaat ernummataasoq: Iliuuseqarnerput naammappa?
Imminut toquttut amerlassusaat sisamanngornermi politiinit saqqummiunneqartut, kajumissutsimik peqatigiiffik Inuuneruna Iggoraarsuk ernumatippaat. Taanna imminut toquttarnermik pinaveersaartitsinermut aningaasat pitsaasumik atorneqarnersut apeqqusiivoq
2016-imi inuit 47-t Nunatsinni imminut toqupput, taakkulu ukiup siulianut sanilliullugit qulinik amerlanerupput.
Politiit nalunaarusiaata aamma inuusuttut imminut toquttartut amerlanerusut takutippaa. Imminut toquttuni inuusunnerpaaq 15-iinnarnik ukioqarpoq.
Atuaruk: Imminut toquttartut isumakulunnartumik amerleriartut
Peqatigiiffik kajumissutsimik ingerlanneqartup, Inuuneruna Iggoraarsuk, pisortat pinaveersaartitsinermut aningaasaliissuterpassuit atortagaat, tamakkiisumik atorneqarnersut annertuumik ernumassutigaa.
Malene Vahl Rasmussenip Inuuneruna Iggoraarsummeersup apeqqutit uku akissutiserusuppai:
- Oqarasuaatikkut attaveqarfissanut pilersinneqartunut qanoq amerlatigisut saaffiginnittarpat?
- Qassinik ukiullit sianertarpat?
- Inuit oqarasuaatinik tigusisut qanoq tunuliaqutaqarpat?
- Qanoq akulikitsigisumik saaffigineqartarpat?
- Inuit pingaarnertut qanoq ikiorneqarumallutik sianertarpat?
- Pisortanut naammattumik iliuuseqarnersut tatiginnigata oqaatiginianngilara. Tassami naammattumik iliuuseqarput. Apeqqutaaginnarpoq iliuuserisaat iluaqutaanersut, tassami inuiaqatigiinni ikiorneqarnissamut periarfissat suunersut suli nalornissutaavoq, Malene Vahl Rasmussen Sermitsiaq.AG-mut oqarpoq.
- Oqarasuaatikkut, peqatigiiffiit, pisortat ikiorsiissutaasa allallu akornanni suleqatigiinneq ernummatigaara. Tassami imminut toquttarnerup siunissami qanoq pinaveersaartinneqarnissaanut tamarmik immikkut paasissutissanik pingaarutilinnik peqarput. Taakku oqaloqatigiinngikkunik, inuit pisariaqartitaminnik ikiorneqarnissamut atugassarititaat ataatsimut pitsanngortinneqarsinnaanngillat, taanna oqarpoq, nangillunilu:
- Taamaanngippat kikkut pinaveersaartitsillaqqinnerpaanersut unammisoqaannassaaq, tamannalu tamatumunnga tunnganngilaq!
Inuusunnerit ernumatitsipput
Inuusuttut imminut toquttartut amerlanersaanerat, taassuma ingammik ernummatigaa.
- Innuttaasut nuna tamakkerlugu imminut toquttarneq pillugu pinaveersaartitsinerinnaanngitsoq, kisisnni pinaveersaartitsineq ataatsimut isigalugu qanoq pitsanngortinniarnerlugu takutikkaluarutsigit, suleqatigiinnermut ikiuutaalluassagaluarpoq, Malene Vahl Rasmussen naqissusiivoq.
Inuuneruna Iggoraarsuk peqatigiiffiuvoq pisortanit aningaasaliiffigineqanngitsoq. Peqatigiiffilli suliniummik ineriartortitsinissamut aningaasaliisortaarlunilu aningaasaateqarfinnit tapiiffigineqarnikuuvoq, taanna massakkut sulissutigineqarpoq.
Malene Vahl Rasmussen ilisimatitsivoq, taakku sulinerannut inuiaqatigiinni soqutiginnittoqaraluttuinnartoq, kisianni aamma tamatumunnga tunngatillugu ikiuinissamik pisariaqartitsisoqarneranik suaartarnerusutut nalilerpaa.
- Sumut saaffiginninnissaminnik nalornissuteqarnertik pissutigalugu uagutsinnut saaffiginnittarput. Ilaqutaasuusinnaapput soriarsinnaanatik misigisut, imaluunniit inuit neriuutaarullutik qanoq iliuusissaaruttut, taanna oqarpoq.