Imminut toquttartut amerlanerujussui oqartussanit iliuuseqarfigineqarpoq
Imminut toquttartut suli amerlasut kisitsisit nutaat takutippaat. Tasiilami nunaqarfiinilu imminut toquttartut amerlasoorujussuupput, oqartussanit tamanna iliuuseqarfigineqarpoq
Nunanut allanut sanilliullugu imminut toqquttartut suli amerlasoorujussuupput. Tasiilami nunaqarfiinilu kisitsit angivoq, tassami imminut toquttartut sisamararterutaat immikkoortumi tassani pisarmata. Immikkoortumi tassani 2.000-it missaannik inoqarpoq.
2017-mi inuit 41-t imminnut toqupput. Ukioq manna septembarip 19-ani kisitsit 32-iuvoq. Tasiilami nunaqarfii ilanngullugit imminut toquttut arfineq pingasuupput, tassa sisamararterutaat. Qaammatit pingasut sinnerlugit qaangiuppata ukioq naassaaq, taamaammat ukioq kingullermut sanilliullugu imminnut toquttut amerlaqatigiipajaassasut naatsortuutigineqarpoq.
- Kommuneqarfik Sermersuumi isumaginninnermut immikkoortortaqarfik aamma napparsimaveqarfik suleqatigalugit Tasiilami pisut nalilersorneqalerput, politimesteri Bjørn Tegner Bay Sermitsiaq.AG-mut oqarpoq.
Ukioq manna imminnut toquttut qanoq amerlatigissanersut naqissusereerneqarsinnaanngitsoq oqaatigaa.
- Septembarip aallartinnerani ukioq manna ukioq kingullermut sanilliullugu imminnut toquttut ikinnerupput. Kisianni ukioq suli naanngilaq, taamaattumik oqaatigineqarsinnaanngilaq kisitsit qanoq isikkoqassanersoq ukioq naappat, politimesteri oqarpoq.