Imminut toquttarnerit aalajangeeriasaartarnerillu pillugit politiit mianersoqqusisut

Nuummi politiit pisortaata Søren Bendtsenip imminut toqunnissamik siorasaarisarnerit amerlanerujussui ernumanartoqartippai.

- Kalaallit Nunaanni ukioq manna inuit 262-it imminut toqunnissamik siorasaarisareerput. Nuummi politiit suliat taamaattut 71-iupput, Søren Bendtsen oqarpoq.

Imminut toqunnissaminnik sioorasaaruteqartut tallimat Nuummi politiinit sapaatip akunnerata kingulliup ingerlanerani orniguffigineqarsimasut, Nuummi politiit sapaatip akunnikkaartumik nalunaarutaanni atuarneqarsinnaavoq.

Suliarineqartartut
Kalaallit Nunaata politiivinit kisitsisini takuneqarsinnaavoq, 2010-mi 62-eriarluni imminut toquttoqarsimasoq kiisalu 63-eriarluni imminut toqunnissamik siorasaarisoqarsimasoq. 2011-mi imminut toquttut 54-iupput 40-riaq imminut toqoriartoqarluni. Imminut toquttut 29-iupput 2012-imi imminut toqoriartut 49-ruusut. Ukioq kingulleq inuit 44-t imminut toqupput kiisalu 65-it imminut toqoriaraluarlutik.

Imminut toqunnissamik siorasaarisut pillugit Kalaallit Nunaata politiivisa suliarisimasaanni kisitsisaatigineqanngilaq.

- Uani pineqartumi eqqartorneqartut attaveqarfigipallattarpagut. Taamatut isiortut imigassartorsimasuusarmata aamma oqaatigisariaqarpoq, Søren Bendtsen oqarpoq.

Ikioriarfissaqarpoq
- Suliani taamaattuni arnaasarput angutaallutillu, qanoq peroriartornerat aamma qanoq inissisimanerat assigiinngitsorujussuupput. Arlaannik anigorsinnaanngisannik ajornartorsiuteqaruit oqaloqateqarnissat pitsaanerpaassaaq.

- Ajornartorsiutitit pillugit inummik allamik oqaloqateqarnissat pingaaruteqassaaq arlaannik ajornartorsiuteqaraluaruit. Taamaasilluni ajornartorsiut alliartussanngilaq. Oqaloqateqarnikkut ajornartorsiutit anigorneqarsinnaapput, politiit pisortaat nassuiaavoq.

Attavik 146 MIO-lu
Attavik 146-kkut oqaloqateqarsinnaaneq Søren Bendtsenip periarfissatut tikkuarpaa, tassani kinaassutsimik isertuussilluni oqaluussisoqarsinnaavoq. Tassani inuit ajornartorsiuteqartut imaluunniit arlaatigut eqqugaasimasut oqaloqatiginnissinnaapput.

Meeqqat pisinnaatitaaffii pillugit sullissisut MIO aamma saaffigineqarsinnaavoq. Tassunga sms-ikkut nassiussisoqarsinnaavoq 1899-mut. Tassani meeqqat inuusuttuaqqallu siunnersorneqarsinnaapput.

Imminut toquttut 14-t nalunaarsorneqartut
Inuit imminut toqoriartut 21-t kiisalu imminut toquttut 14-t politiinit nalunaarsorneqarput ukioq manna. Taakkunani Nuummi imminut toqoriartuupput inuit arfineq marluk kiisalu imminut toquttut marluk.

- Kukkusumik ingerlannaartumik aalajagiisoqartarnissaa pinaveersaartinneqassasoq siunnersuutigaarput. Ataatsimoorluta aamma kisitsisit pitsaanerusumut inissitsigit, Søren Bendtsen oqarpoq.