nannut
Imminut illersornermi nannut amerlasuut aallaaneqartarput
WWF Verdensnaturfondenip misissuinerata takutippaa nannut 14-t imminut illersornermi aallaallugit toqunneqarsimasut 2014-mi
Nunarsuatsinni silaannaap ajornartorsiutai pillugit nunat 195-t Perumi ataatsimeeqqammerput. Silaannaap allanngoriartornerata sunniutigisai Kalaallit Nunaanni malugineqarsinnaalereerput.
Ikinnerpaamik nannut aqqaneq marluk imminut illersorniarnermi toqunneqarput qaammatini siullerni qulingiluani, WWF Verdensnaturfondenip misissuinerata paasinarsitippaa.
Imminut illersorniarluni nannut aatsaat taama amerlatigisut toqunneqarsimasut WWF Verdensnaturfonden nalunaarpoq. Silap allanngoriariartornera tassani pissutaaqataasoq WWF-imit biologi Charlotte Moshøj oqarpoq.
Nannummi sikumi piniarnerusaraluarlutik sikuerukkiartornera pissutaalluni nunami nerisassaminnik ujarlertalerput, biologi oqarpoq.
- Nannut nerisariaqavikkaangamik illoqarfinni nerisassarsiortarput. Inuit soqutiginnginnerusarpaat nerisariaqavikkaangamik, oqarpoq.
Illoqqortoormiuni tamanna arlaleriarluni misigineqartareerpoq. Sapaatip akunneranut arlaleriarluni ilaatigut nannunik nerisassarsioriartunik illoqarfimmiittoqartarpoq.
Qimminut nerukkaatissat nannunit soqutigineqarluartartuupput.
Nannut inuit nerisassatut isigineq ajorpaat aarlerinartutulli isigisarlugit, Charlotte Moshøj nassuiaavoq.
- Nannut inuit najugaqarfiisa eqqaanniittut toquinnarneqaqqusaanngillat, biologi oqarpoq. Nannut qassit ukiumut pisarineqarsinnaanersut killilersugaasoq oqaatigaa, amerlanerusunillu pisaqartoqassappaat aatsaat qinnuteqaatigineqaqqaartussaasoq oqaatigalugu.
- Nanoq saassussissappat aallaaneqarsinnaavoq, taannalu pereeriarpat aatsaat qinnutigineqarsinnaalluni, Charlotte Moshøj oqarpoq.