selvstændighed

Immikkut ilisimasallit: Namminiilivinnissaq suli ungaseqaaq

Kalaallit Nunaata piffissami qaninnerusumi namminiilivinnissaminut periarfissai ukiuni kingullerni taamaallaat minnerulersimasut, Danmarkimi naalagaaffiup isumannaatsuunissaanik politikkimik immikkut ilisimasallit isummersuisartullu nuimanerit isumaqarput

Naalakkersuisuni amerlanerussuteqartut saammaasseqatigiinnissamut isumalioqatigiissitamik pilersitsipput – namminiilivinnissarlu siunniullugu. Qallunaalli immikkut ilisimasallit tamanna qularnartoqartippaat

Siumut, IA aamma Partii Naleraq naalakkersuisoqatigiinnissamut isumaqatigiissumminni imaassinnaavoq isumaqatigiissutigigaat, Kalaallit Nunaat unitsinneqarsinnaanngitsumik namminiilivinnissap tungaanut ingerlasoq. Aamma imaassinnaavoq innuttaasut amerlanerussuteqartut, HS Analysep isumasiuinera naapertorlugu tamanna tapersersoraat, tassa tamatumunnga atatillugu ingerlatiinnarlugu ataatsimoortumik tapiissutit peerneqarnissaannik aperineqanngikkaangamik.

Atuaruk: Namminiilivinnissamut aningaasartuutissat millionilikkuutaat

Ungasilliallattut
Taamaattorli taakkununnga taarsiullugit ”inuit, Danmarkimi nunanut allanut isumannaallisaanermullu politikkimik pilersitsisartut, paasinnittartut oqaaseqarsinnaasullu” aperigaanni, soorlumi Københavnip Universitetiani sakkutooqarnikkut ilisimatusarfimmit taamaaliortoqarsimasoq, namminiilivinnissaq uaneralaarsuarmiinngilaq.

Isumannaallisaanermut politikkimi 2017-imut uuttuutigineqartumi saqqummersinneqaqqammersumi, immikkut ilisimasallit aperineqartut naapertorlugit namminiilivinnissaq ungasilliallaannarsimavoq.

2013-imi 12 procentingajalluinnaat isumaqatigaat, Kalaallit Nunaat ukiut qulit ingerlanerini namminiilivikkumaartoq, maannali taamaallaat 2 procentingajalluinnaat tamanna ilimagaat. 90 procentingajaat tamatuma piviusunngorsinnaanera ilimaginngilaat, taama isummertut taamani 64 procentiusimagaluarput.

Atuaruk: Tunngaviusumik inatsiseqalernissamut isumalioqatigiissitami inissat agguataarneqartut

Aningaasaqarneq
Piffissaq ungasinnerulaartoq isigalugu amerlanerulaartut Kalaallit Nunaat allanik isumalluuteqanngitsoq takorloorsinnaavaat. Aammali tamatumani ilimaginnittut ikileriarsimapput. Kalaallit Nunaat ukiut 20-t ingerlanerini imminut napatilerumaartoq, 2013-imi 45 procentingajaat ilimagaat, maannali taama isumaqartut 13 procentiinnanngorsimallutik. 72 procentit tamanna upperinngilluinnarpaat, taamani 34 procentiusimagaluarlutik.

Akissutit takutippaat, immikkut ilisimasallit kalaallit politikerii aamma qinersisartut piumassuseqarnerat namminiilivinnissamut maligassiuisutut pingaartinngikkaat, tamatumali akerlianik aningaasarsiornikkut qanoq inissisimaneq isiginiarneqartoq, nalunaarusiami allaaserinnittuni pingaarnertut inissisimasoq Kristian Søby Kristensen oqarpoq.

- Isumaqarpunga kalaallit namminiilivinnissaannut isumaqartut ikiliartornerannut pissutaasoq aatsitassarsiornissamut siunissamut takorluukkat minnerulersimanerat. Taamaalillutik aningaasarsiorneq aamma namminiilivinnissaq imminnut ataqatigiissippaat. Akissutit Kalaallit Nunaanni oqallinnermut naapertuutinngitsut malunnarpoq, sivisuumik ilisimatusarsimasoq oqarpoq.

Atuaruk: Namminiilivinnissamut angertut amerlanerussuteqarluartut

Allaaserisaq tamaat AG-mi uani sapaatip akunnerani saqqummertumi atuaruk. Aviisi uani pisiariuk:

Powered by Labrador CMS