Naalakkersuisoqarfik

Immikkut ilisimasalik: Soraarsitsinerup tunngavia politikkerit oqaatigisinnaavaat

Danmarkimi paasissutissiinermut ingerlatsinissamullu immikkut ilisimasallip oqaatigaa Naalakkersuisut siulittaasuata Naalakkersuisoqarfiani pisortaasup atorfimminit tunuartitaagallarneranut tunngaviusoq ilisimasitsissutigineqarnissaa pissusissamisoortoq

Naalakkersuisut siulittaasuat Kim Kielsen, Siumut

Naalakkersuisut siulittaasuata Naalakkersuisoqarfiani pisortaasup tunuartitaagallarnera tupaallaatigineqarpoq marlunngormat.

Taamaasilluni Svend Hardenberg Naalakkersuisut siulittaasuata Naalakkersuisoqarfiani pisortaajunnaarpoq.

Imaluunniit?

Tassami tunuartitaagallarneranut tunngavilersuutigineqartoq suli ilisimatitsissutigineqanngilaq.

Ilisimasalik: Pisoq eqqumiiginarpoq
Soraarsitsinermut tunngaviusoq ilisimatitsissutigineqartariaqartoq Danmarkimi paasissutissiinermut ingerlatsinissamullu immikkut ilisimasalik Oluf Jørgensen oqarpoq.

Tamanna KNR-imit ilisimatitsissutigineqarpoq. Svend Hardenbergip atorfimminit tunuartitaagallarnera soraarsitsinerusoq Oluf Jørgensenip oqaatigaa.

- Eqqumiiginarpoq politikkerinut aqutsisut atorfimmi qaffasissumi tunuartitsisoqartillugu tunngaviusoq pillugu nassuiaateqarusunnginnerat Oluf Jørgensen KNR-mut oqarpoq.

- Inuiaqatigiinnut kalaallinut pingaaruteqaraluarpoq taamatut pisoqarneqatigut suut tunuliaqutaanersut ilisimatitsissutigineqarnissaat, aamma politikkerit pisinnaatitaapput inatsisitigulli pisussaaffeqanngillat, paasissutissiinermut ingerlatsinermullu inatsisilerinermut tunngasunik immikkut ilisimasalik Oluf Jørgensen oqarpoq.

Svend Hardenbergip atorfimminit tunuartitaagallarnera Naalakkersuisit siulittaasuata Kim Kielsenip Siumumeersup annertunerusumik oqaaseqarfigisinnaanngilaa 'inunnut ataasiakkaanut tunngassuteqarnera' pissutaalluni.

Søren Hald Møller Naalakkersuisut siulittaasuata Naalakkersuisoqarfiani pisortaagallartussatut ivertinneqarpoq.

Powered by Labrador CMS