Kangerlussuaq
Immikkoortortaq nutaaq: Naalakkersuisoq eqqunngitsumik paasissutissiivoq
Partii Naleqqap Sisimiuni immikkoortortaqarfiata nutaap attaveqarnermut naalakkersuisoq, Knud Kristiansen (A) isornartorsiorpaa
Allaaserisaq pingasunngornermi nalunaaqutaq 14.01 allanngortinneqarpoq
Partii Naleraq sapaatip-akunnerata naanerani Sisimiuni immikkoortortaqarfimmik pilersitseqqammertoq, attaveqarnermut naalakkersuisoq, Knud Kristiansen (A) iluarinngilluinnarpaa.
Immikkoortortaqarfik isumaqarpoq, taanna tutsuiginanngitsumik tungavilersuilluni Kangerlussuup mittarfeqarfiata iluarsaannissaa 2 milliardinik akeqassanerarlugu.
Atuaruk: Partii Naleraq Sisimiuni immikkoortortamik pilersitsivoq
Naalakkersuisumut tatiginninngitsut
- Tamanna tassunga (Knud Kristiansen, red.) tatiginnikkunnaarnitsinnik kinguneqarpoq. Tassami paasissutissat taamak nikingatigisut takutitsiinnarmata matusiniavissornermik siunertalimmik aningaasartuutissanik missingersuutissanik ujaarlertoqarsimasoq, Partii Naleraq Sisimiuni siulersuisut sinnerlugit, siulittaasoq Henrik Fleischer taama oqarpoq.
Tamatuma saniatigut Naleqqap immikkoortortaqarfiani nutaamit Jens-Erik Kirkegaard kamaatigineqarpoq, Kangerlussuup mittarfia pingaarnertut atuukkunnaarnissaanik oqaatiginninneqarnerarluni.
Ullumi Kirkegaard Sermitsiaq.AG-mut erseqqissaavoq, siunissami angallannerup ilusaa kisimi Nuummi Ilulissanilu mittarfiit tallineqarpata, Kangerlussuup pingaarnertut mittarfiuinnarsinnaanersoq apeqqutaassasoq.
Atuaruk: Kangerlussuaq nalorninartumik siunissaqalersoq
Sisimiut Kangerlussuullu akornanni aqqut
Partii Naleraq Sisimiuniit Kangerlussuup mittarfeqarfittut pingaarnertut piuinnaarnissaa tamaviaarlutik anguniassallugu aammalu tamakkiisumik iluarsartuunneqarnissaa, taassumalu saniatigut Sisimiut Kangerlussuullu akornanni aqqusiniliortoqarnissaa tamakkiisumik anguniassallugu neriorsuutigineqarpoq.
- Qulaani tunngavilersuutigut tunngavigalugit Qeqqata Kommuniani aammalu sinerissami inuttaasut kajumissaarpagut una suliniut oqallisigalugulu tapersersussagipput, tassami Nuup avataani najugaqartugut kingulliunneqartuaannarnerput naammaleqaaq, Partii Naleraq Sisimiut taama nalunaaruteqarpoq.
Aamma atuaruk: Nuuk Ilulissallu Kalaallit Nunaannut isaaffinngussapput