Sunday, March 19, 2017 - 13:27

Immikkoortoqarfik: Piviusunngortitsisinnaannginneq Kim Kielsenip siulittaasuuneranik akeqarsinnaavoq

Kim Kielsenip pilersaarutini piviusunngortissinnaanngikkunigit Siumumi siulittaasuujunnaarsinnaavoq.
Assi.: Leiff Josefsen
Sinerissami sanaartugassanik aallartitsisimannginneq avissaartuunnermut patsisaaqataasutut Ilulissani siumup immikkoortoqarfiani siulittaasup, Bernhardt Olsenip, nalilerpaa. Tamannalu Kim Kielsenimut akisunaarneqarsinnaasoq oqaatigalugu.

- Inatsisartuni inuussutissarsiutitingut sanaartungassat annertuut piviusunngortinneqarnissai isumaqatingiissuteqarfioreersut, piviusunngortinniarlungit naalakkersuisuni sulineq uninngasutut nalilerparput sulianut pineqartunut. Siumut Ilulissaniit Siumut iluani taannarpiaq eqqissiviilliutaappat paasinarluarpoq.

Ilulissani SIumup immikkoortoqarfiani siulittaasua, Bernhardt Olsen taama oqarpoq. Naalakkersuisulliuna suliassaminik, inuussutissarsiutitingut sanaartungassanik aallartitsisinnaannginneranut paasinartumik eqqissiviilliorneq aallaaveqassasoq nalilerlugu.

Atuaruk: Lars-Emil Johansenip Kim Kielsen isornartorsiorpaa

Partiip iluani avissaartuunneq paasisinnaavaa

- Siumumi eqqissiviilliorneq Lars Emil-ip siulittaasunngunngittoorsimaneranut attuumassuteqanngilluinnartoq Siumut Ilulissaniit isumaqarpungut. Naalakkersuisulliuna Siulittaasuata suliassaminik, inuussutissarsiutitingut sanaartungassanik aallartitsisinnaannginneranut paasinartumik eqqissiviilliorneq aallaaveqassasoq Siumut Ilulissaniit naliliivungut, Bernhardt Olsen tusagassiuutinut nalunaaruteqarpoq.

Ilulissanilu mittarfiup allilerneqarnissaa piffissami qanittumi aallartinneqassasoq kissaatigaa.

- Ilulissat kisimi mittarfiup allineqarnissaani iluaquserneqarani Diskobobugtimullu tamananut iluaqutaassaaq, inuussutissarsiutit eqqarsaatigalugit.

- Nunatsinni tamatta soorunami kissaatingaarput aningaasarsiornikkut namminiilerusulluta, taassumallu malitsingisaanik politikkikkut namminersulivinneq angorusullutingu. Ilulissanilu mittarfiup allineratingut avataaniit aningaasarpassuarnik isaatitsisinnaanerput, missingersuusiorfingineqareernikuuvoq. Taamaattumik Parti Siumumi taamatut aningaasarsiornikkut siuariaatissanik periarfissangissunik politik-ikkullu akuerisaareertunik piviusunngortitsiniarluni sulinerup arriippallaarnera, eqqissiviilliutingineqarmat, Bernhardt Olsen oqarpoq.

Atuaruk: Kielsen Lars-Emilimit qoqassineqartutut misigivoq

Siulittaasuujunnaariaannaasoq

Inuttaasut utaqqiinnarsinnaanngillat. Siumullu partiiani siulittaasuujunnaarsinneqarsinnaalluni, Bernhardt Olsen oqarpoq.

- Ilulissani mittarfimmik allileriniarneq utaqqikatalerparput. Taannarpiarlu ersarissumik uppernassusilimmik qaammatini tulliuttuni alloriarfingineqanngippat, Siumumi nuna tamakkerlugu siulittaasussarsiulerutta, massakkut siulittaasuusup (Kim Kielsen) toqqarnissaa periarfissakitsuaraatipparput, Bernhardt Olsen oqarpoq.

Aasaru Siumut ataatsimeersuartitsissaaq.

Atuaruk: Siumumi maanna saqqumiinnartumik assortuupput

Atuaruk: Siumumit qinigassanngortittup iluminni assortuunneq nuannaarutigaa

Seneste nyheder / Nutaarsiassat kingulliit