ilaalanga
Immikkoorlutik innuttaasunik ataatsimiititsinerat isornartorsiorpaa
Ippassaq Qeqqertarsuatsiaani aalisarneq aatsitassarsiornerlu pillugit innuttaasunik ataatsimiititsinermi Naalakkersuisut nutaaliorlutik nunaqarfiup kommunia akulerutsinngilluinnarpaat
Naalakkersuisut siulittaasuat Kim Kielsen aamma aalisarnermut, piniarnermut nunalerinermullu naalakkersuisoq Karl-Kristian Kruse, marluullutik partiimit Siumumeersut, ippassaq namminerisaminnik Qeqertarsuatsiaani innuttaasunik ataatsimiititsipput.
Tamannali sioqqullugu kommuni, nunaqarfimmi aatsitassarsiornermut aalisarnermullu politikkimik ingerlatseqataasimasoq, innuttaasunik ataatsimiititsinissaq pillugu paasissutissinneqaranilu qaaqquneqarsimanngilaq.
Oqanngilluinnarsimapput
Tamanna Kommuneqarfik Sermersuumi tungiuinermut, sulisartoqarnermut inuussutissarsiornermullu ataatsimiititaliami siulittaasup Malene Lyngep (IA) mamiagaa.
– Tupigusuutigaara naalakkersuisoq Karl-Kristian Kruse Naalakkersuisullu siulittaasuat Kim Kielsen Qeqertarsuatsiaaliarmata rubinisiorneq aalisarnerlu pillugit innuttaasunik ataatsimiititsiartorlutik, kommuni sumilluunniit attaveqarfigeqqaarsimanagu, taanna Sermitsiaq.AG-mut oqarpoq.
Taanna nassuiaavoq ukiuni arlalinni ileqquusimasoq Naalakkersuisut innuttaasunik ataatsimiititsissagaangata kommunip qaaqquneqartarluni, imaluunniit minnerpaamik tamatuminnga paasissutissinneqartarluni.
Kommuni killormut taamaasiortarpoq, kommunimi politikeri oqarpoq.
Suleqatigiilluarput
– Taamaattumik tupigusuutigaara taakku angalanissaannik kommuni paasissutissinneqarsimagunanngimmat. Pingaartumik tupigusuppunga pissutigalugu Qeqertarsuatsiaanut tunngasunik suleqatigiilluaqigatta, suleqatigiissutigisavullu pillugit innuttaasunik ataatsimiititsineq pineqarmat ingammik tupigusunnerulerpunga.
Tungiuinermut, sulisartoqarnermut inuussutissarsiornermullu ataatsimiititaliap siulittaasuata Naalakkersuisut nassuiaateqaqquvai, nassuiaatissaallu pissangalluni utaqqissallugu Sermitsiaq.AG-mut oqarpoq.