Immiaaraq immikkut suliaq rekortiliinissamut qanillisoq

Immiaaraq immikkuullarissoq nunatsinneersoq, danskit orpiinit meqqutaasalinnit aamma sermersuarmit kalkeqanngitsumik imertalimmik immiugaq akitsorterussinermi pisiumasunut soqutiginangaarmat, maannamut 5.000 koruunilerlugu pisiariumaneqareerpoq. Immiaaraq taanna 3.000 koruuninik akeqarsinnaasoq nalilerneqarsimagaluarpoq.

Suli akisunerulersinnaasoq
Akialu suli qaffanneqarsinnaavoq, akitsorterussineq suli februaarip 20-ata tungaanut ingerlasussaammat.

Tassani puiaasaq ''Tannenbaum'', puiaasat 1.800-nik tunisassiarineqarsimasoq pineqarpoq, puiaasaq 75 cl. 5,09 procentinik aalakoornartortaqarpoq.

Immiaaraq Nuummi ineriartortinneqarsimavoq.

Orpimmik akulik
Danmarkimi orpiit toqqaqqissaarneqarsimasut Kalaallit Nunaannut umiarsuarmik tikisinneqarput, orpiillu toqqakkat agguarneqariarlutik immialiamut ilanngunneqarput.

- Immiaaqqat nunarsuarmi akisunerpaartaat ilaat Kalaallit Nunaanneersuusoq quianalaarsinnaavoq, immiorfimmi pisortaq Sermitsiaq.AG-mut oqarpoq.

Immiaaraq sorleq nunarsuarmi akisunerpaanersoq nalornissutigineqartoq taanna ilisimatitsivoq. Tamanna immiaaqqat umiiarnikunit immiaaqqat qaqitat akitsorterussinermi akisoorujussuusarnerannik pissuteqarpoq.

Qaffasinnerpaami
- Kisianni immiaaqqani tunisassiarineqaqqammersut akisunerpaat akornanniippugut, akitsorterussinerlu suli naammassinngilaq, Nicolai Nissen oqarpoq.

Akitsorterussineq uani lauritz.com-imi malinnaavigisinnaavat