isumannaatsuuneq

Immap assinginut isumaqatigiissut nutaaq - piffissaligaanngitsorli

Attaveqaqatigiinnermut naalakkersuisup Erik Jensenip aamma danskit pilersuinermut silallu pissusianut ministeriata Lars Christian Lilleholtip ataatsimiinneranni immap assingisa digitalinngortinneqarnissaannut isumaqatigiissummik nutaamik atsioqatigiittoqarpoq. 2018-ip naalernerani assit qaqugu piareerumaarnerannik aatsaat pilersaarummik piareertoqassaaq.

Pilersuinermut silallu pissusianut ministeri Lars Christian Lilleholt (V) nalornisimassappat, taava erseqqissaaqqittoqarpoq.

- Immap assingi digitaliusut piffissaq eqqorlugu naammassinnginnerat naammagisimaarnanngilaq. Imaatigut isumannaallisaanermut pingaaruteqartorujussuupput, attaveqaqatigiinnermut naalakkersuisoq, Erik Jensen (S), Sermitsiaq.AG-mut taama oqarpoq.

Kisianni naammagisimaarinninnginneq imaluunnit oqaatsit annertuut nutaanik immap assinginik pilersitsinavianngillat. Taamaammat illuatungeriit ippassaq ataatsimiinnerminni siumut isiginiarlutik aalajangerput.

- Maanna nutaamik qanoq pilersaarnermut isumaqatigiissummik atsioqatigiippugut, Lars Christian Lilleholt (V) sanaartornissaannut pilersaarummik piviusorsiortumik piaarnerpaamik saqqummiussinissaanik tamanna isumaqarpoq.

Allatut oqaatigalugu, immap assingisa qaqugu piareersinnaanissaat suli aalajangersimasumik pilersaarutitaqanngilaq. Kisianni illuatungeriit naapertorlugit tutsuiginartumik isumaqatigiissusiortoqarpoq, nutaamik assioliortoqarnissanut pilersaarummik imaqartumik. Assiliornissamulli pilersaarut nutaaq 2018-ip naanerani piariissaaq.

Katillugu immap assinginik digitaliusuni 73-nik sanaartortoqassaaq. Geodatastyrelsenip nittartagaani atuarneqarsinnaavoq, 2015-ip tungaanut assit 32-it sanaartorneqarsimasut. Taamanili suli ataatsimik sanasoqaqqinngilaq. Geodatastyrelsenip Aalborgimut nuunneqarnikuunnera tamatumunnga tunngaviuvoq, kisianni sulisunit 15-iusunit ataasiinnaq nooqataasimavoq.

- Piffissaliussatut pilersaarut maanna malinneqassasoq, ataatsimiinnermi naqissuserpara, Erik Jensen (S) oqarpoq.

- Pilersuinermut silallu pissusianut ministerip Lars Christian Lilleholtip tamanna ataqqivaa, taamaammat taakku ukiuni qaninnerni pissarsiariumaarigut toqqissisimassutigaara.

Lars Christian Lilleholtip (V) siornatigut nalunaarutiginikuuaa, kingusinaarnermut arlaatigut taarsiissuteqartoqassasoq.

Kalaallit Nunaannut tamarmut kangiata kujataanuinnaanngoitsoq immap assinginik assiliortoqarnissaanik, taarsiissutaasut ilagisinnaavaat.

Tamatuma saniatigut Tele-Post aamma Energistyrelsen ukiuni qulini atuuttussami isumaqatigiissuteqalerput, taanna ungasissumut aamma ingerlatsinikkut aningaasaliinikkullu sinaakkutitigut Nunatsinni imaani isumannaallisaanikkut radiop attanneqarnissaanut qulakkeerinnissaaq. Tamatuma imaatigut angallanneq suli isumannaannerulersissavaa.

Aamma atuakkit:

Immap assinganik sanaartorneq unittooqqasoq

Immap assinganik sanaartornermi sulisorineqartussat ukiut pingasut qaangiuppata aatsaat piariissapput

Immap assinganik suliaqarneq tupannartoq

Powered by Labrador CMS