kusanaatsuliaq

Immap assinganik suliaqarneq tupannartoq

Kalaallit ilaasortaatitaasa Enhedslisten aamma Socialdemokratiet peqatigalugit immap assinganik suliat pillugit ministeri isumasioqatiginissaanut aggersarusuppaat.

'Tupannarpoq, iluarluarani, poqeeqalunilu'. Christian Juhl Enhedslisteniminngaanneersup immap assingi digitaliusut suliat pillugit oqaatsinik sakkortuunik nassaassaaleqinngilaq.

Suleqataalu Aaja Chemnitz Larsen (S) oqaaseqarnermini ileqquni malillugu oqaatsinik atuillaqqinneruvoq. Kisianni suliami ilungersunartumik inissisimaneq pillugu naqissusiivoq.

- Inuuneq toqulu pineqarput. Suliarineqarnerilu iluatsissappat nukiit tamarmik atorneqartariaqarput, taanna Sermitsiaq.AG-mut oqarpoq.

Ukiup ataatsip ingerlanerani immap assinganik sanasoqarsimanngitsoq

Taamaammat taanna aamma Chrisian Juhl, Aleqa Hammond (A) aamma Karin Gaardsted Socialdemokratineersoq peqatigalugit klima- og energiminister Lars Christian Lilleholt (V) Kalaallit Nunaanut ataatsimiititaliami isumasioqatigiinnissamut aggersarpaat.

Ukioq ataatsip matuma siornali suliaq pillugu Aaja Chemnitz Larsen (IA) apeqqarissaanermi oqallisissiarisimavaa. Taamanilu immap assingi 73-nit 32-t kisimik naammassineqarsimasut Lars Christian Lilleholtip (V) paasissutissiaraa. Tamatumalu kingorna immap assinganik ataasinnguamilluunniit sanasoqarsimanngitsoq, sapaatip-akunnerata aallartilaarnerani Politikenip oqaluttuaraa.

- Immap assinginut suliaqarneq aaqqiivigineqarsimanngimmat, tupannarpoq, Christian Juhl (EL) oqarpoq.

Sulissutigineqapallannissaat neriorsuutigisimangaa

Apeqqarissaarnermilu immap assingisa sanaartorneqapallannissaat sulissutigineqapallassasoq, Lars Christian Lilleholtip (A) neriorsuutigisimavaa. 2018-llu naanerani pilersaarutit malillugit killiliunneqarsimasoq angumerineqarsinnaanngitsoq, taamani nassuerutigaa.

- Geodatastyrelsenip Kalaallit Nunaani immap assingisa sanaartorneqarnerinut kingunerluutissat minnerpaaffimmiitinniarlugit annertuumik sulissuteqarpoq, ilaatigut sulisunik atorfinitsitsinikkut aqutsiveqarfiup nunat tamalaat akornanni suleqatigisaminit ikiorneqarnermikkut aammalu imarsiornikkut suleqatigisanit ikiorserneqarnikkut, Lars Christian Lilleholt (V) oqallinnermi oqarpoq.

Sulisut Aalborgimut nooqataarusunngitsut

Geodatastyrelsep Aalborgimut nuunneqaranera pissutaalluni, immap assinganik sanaartorneq unittuuissimavoq. Sulisorineqartunit 15-nit ataasiinnaq Aalborgimut nooqataasimavoq.

- Suliami iliuuseqartoqarsimannginnera assut isumakulunnarpoq. Ministeri apererusupparput ajornartorsiummut qanoq aaqqiiniarnersoq, Aaja Chemnitz Larsen (IA) oqarpoq.

Sivisuumik Ilinniartitsineq

Piffissaliussarineqarsimasorli angumerineqarsinnaannginnera pissutigalugu Naalakkersuisut nutaamik isumaqatigiissuteqarfigineqassasut, apeqqarissaarnermi klima- og energimisterip neriorsuutigaa. Ukiorli ataaseq sinnerlugu qaangiuppoq suli isumaqatigiissuteqartorani.

Sulisunillu annaasaqarnermi sulisorineqalertut sulisutoqqaniit ilitsersuunneqarnissaat aaqqissutiginiarneqarpoq. Sivisussaarli. Sulisorineqalersummi nunanit allanit tikisitat suli sanaartornermik aallartitsisimangunanngillat.

- Immap assinginik sanaartornerup aallartinneqarnissaa pingaarnerpaasariaqarpoq, Aaja Chemnitz Larsen (IA) oqarpoq.

Taartisiaq

Immap assinganik kinguaattoorutit pillugit Kalaallit Nunaat arlaatigut taarsiivineqarsinnaasoq, Lars Christian Lilleholtip (V) neriorsuutigisimavaa. Taarsiissutissarlu sunarpiaassanersoq taassuma erseqqissumik oqaaatiginngilaa. Christian Juhlillu (EL) neqerooruteqarneq uniffiginngilaa.

- Taarsiiniarneq sumut iluaqutaassagami? Imaani ajutoornissap pinaveersaatinneqarnissaat pineqarpoq, taamaammat immap assingi piareerniarsigit, taanna oqarpoq.

Socialdemokratit naalakkersuisui kinguaattoortut

Christian Juhlip (EL), Lars Christian Lilleholt (V) immap aasinganik sanaartorneq siuartunnginnera Kalaallit Nunaanut ataatsimiititaliamut nalunaaruteqarsimannginnera pillugu isornartorsiorpaa.

- Suliap kinguarsarneqannginnissaa isumasioqatigiinnermi qulakkeerusuppara, Aaja Chemnitz Larsen (IA) oqarpoq.

Geodatastyrelsenillu nuunneqannginneraniilli immap assingi kinguaattoorfioreersimapput. Rigsreviosinimmi 2013-mi nalunaarusiami sanaartorneq kinguaattoorfiusoq oqaatigeersimavaa. Taamanikkut massakkut naalakkersuisuusut Venstret, Socialdemokratiet naalakkersuisuunerisa nalaani nipituuliorutigisimavaat.

Isumasioqatigiinneq qaqugut pissanersoq suli aalajangerneqanngilaq.

Powered by Labrador CMS