Friday, August 11, 2017 - 11:19

Immap assinganik sanaartornermi sulisorineqartussat ukiut pingasut qaangiuppata aatsaat piariissapput

Attaveqatigiinnermut Naalakkersuisup immap assinganik sanaartornermi killiffik pillugu danskit klima- og energiministeriannut apeqquteqarniarpoq.

Immap assingi digitaliusut qaqugu naammassineqarnissaat suli oqaatigiuminaappoq. Ukiunilu arlalinni ingerlanneqarnissaa qularnarani.

2020-mi suleqatigiit suliaqartussat naammalernissaat naatsorsuutigineqartoq Geodatastyrelsimit ilisimatitsissutigineqarpoq, Attaveqatigiinnermut Naalakkersuisup, Erik Jensenip (S) tusagassiuutinut nalunaarutaani erserpoq.

Piffisami killiligaanngitsumik kinguartitsineq

Immap assingisa 2018-mi naammassineqarnissaat pilersaarutaasimangaluarpoq. Massakkulli Geodatastyrelsen ulluleerusunngilaq.

- Suliassaq 2009-mi isumaqatigiissut naapertorlugu naammassineqarsinnaanngimmat uggornartorujussuuvoq. Taamatut kinguaattoortoqarnera soorunami naammaginanngilaq, Erik Jensen (S) oqarpoq.

Immap assingi katillugit 73-t sanaartorneqartussaapput. Immallu assingi 2015 tikillugu 32-t sanaartorneqarsimasut, Geodatastyrelsenip nittartagaani erserpoq. Kingornalu ataasinnguamilluunniit sanaartortoqarsimanngilaq.

Augustimi ataatsimiinniartut

Suliarlu pillugu Erik Jensenip (S), klima- og energiminister Lars Christian Lilleholt (V) eqqartueqatiginiarpaa, taakku uani qaammammi ingerlasumi ataatsimiinniarput.

- Ministerip immap assiliornerup annikinnerpaamik kinguaattoorfiusumik naammassineqarnissaanut periarfissat pillugit nassuiaateqarnissaanut qilanaarpunga, taanna oqarpoq.

Piffissamik pilersaarusiukkamik piumasaqartoq

Geodatastyrelsenip Aalborgimut nuunneqarani sulisorineqartuni 15-nit ataasiinnaq nooqataasimanera immap assinganik sanaartorluni unittuuveqqanermut pissutaavoq.

- Suliami tassani suliffinnik taamatut nuussinerup kingunerisaanik ikaarsaarnermi ajornartorsiuteqartoqartussaasoq siumut ilisimaneqareersinnaammat, danskit naalakkersuisuisa Kalaallit Nunaanni immap assinginik nutaanik suliaqarnerup kipineqarani ingerlatiinnarneqarnissaa danskit naalakkersuisuisa qulakkeersimassagaluaraat kissaatigisinnaagaluarpara, Erik Jensen (S) oqarpoq.

Lars Christian Lilleholt (V) ataatsimeeqatigileruniuk immap assingi qaqugu naammassineqarnissaat paasiumallugu qinnuiginiarpaa.

- Taamaattumik immap assiliornerup sulianut allanut, Kalaallit Nunaata sineriaani immakkut angallannerup isumannaassusianik siuarsaaffiusinnaasunut ilagitillugu tatiginartumik, piffissamut pilersaarummik iluarsiiffiusumik pitsaanerpaamillu siumukarnissaa Naalakkersuisunut pingaaruteqarpoq, Erik Jensen oqarpoq.

Kinguaattoorneq pissutigalugu Naalakkersuisut nutaamik isumaqatigiissusiorfigineqassasut, 2016-mi maajip qaammataani klima- og energiministerip Lars Christian Lilleholtip (V) neriorsuutigaa. Ullorli manna tikillugu suli isumaqatigiissuteqartoqarsimanngilaq.

Lars Christian Lilleholtilu (V) Nunatsinnut una qaammat tikeraarnerani, nutaamik isumaqatigiissuteqartoqarnissaa Erik Jensenip (S) neriuutigaa.

Seneste nyheder / Nutaarsiassat kingulliit