imigassartorneq
Imigassat akikillineqartarnerinut inerteqquteqarnissaq tapersersuisoqanngitsoq
Naalakkersuisut imigassat aalakoornartut pisiniarfinni aamma imerniartarfinni akikillineqartarunnaarnissaanut siunnersuutaat Sermitsiaq.AG-mi atuartartunit sukangasumik isumaqatigineqanngilaq.
Uani nittartakkami atuartartut akornanni amlerlanerussuteqarluartut imigassap aalakoornartup akikillineqartarneranut inerteqquteqalernissaq itigartippaat.
83 procentii siunnersuummut naaggaarput. Kisitsisit ullaaq manna nalunaaqutaq 6:30-meerput, tassani inuit 1.715-t taasisimapput. Kisianni taasititsineq ippassarli aallartimmat akerliusut 80 procentinit amerlaneruinnavissimapput.
Peqqissutsimut naalakkersuisoqarfiup inatsisissatut siunnersuut tusarniaassutiginiarlugu nassiuppaa, tamatuma imigassamik atuineq millisinniartussaavaa. Akikilliinermut aamma happy hourimut inerteqquteqarnerit siunnersuummi suliniutit ilagaat.
Tamannali uani nittartakkami atuisunit taperserneqanngilaq.
- Allamik oqarfiunngilaq, ajornartorsiutit amerlisarneqalerput, Inuk kinaluunniit imerusukkuni qanorluunniit akeqaraluarpata imertuassooq, tamannalu aaqqiissutissamik ujartuinerunngilaq, ajornartorsiutinik suli annerusumik pilersitisussaavoq taamatullu aaqqiiniarneq kukkuneruvoq, Tim Serritzlev oqaaseqartarfimmi ilaatigut allappoq.
Aamma atuaruk: Siunnersuut: Imigassanik akikilliisoqartarunnaassaaq
- Sunaana killilersuinersuaq ileqquuleraluttuinnartoq - qatsunnarseqaaq, Hjalmar Dahl allappoq, taanna atuartartut allat taperserpaat.
- Aalakoornartoq immineq ajornartorsiutaanngilaq. Inuup nammineq nerisani imikkanilu aquttarpai, Else Kreutzmann ilaatigut allappoq.