Imigassaq: IA-p inatsimmi allannguutit aalajangersimasut tapersersinnaavai
Aalajangiiffissatut siunnersuutit sisamat, imigassamut inatsimmik ukiormanna marsip aallaqqaataani atuutilersumut assortuussutaasumut allannguisussat, Inatsisartuni siullermeerlugit suliarineqarput, tassanilu allannguutit aalajangersimasut akuerisinnaallugit, IA nalunaaruteqarpoq.
Nunatsinni immiorfiit tunisassiaminnik pilerisaaruteqarsinnaanissaat akuerissallugu piareersimapput, tamatumunngalu atatillugu allannguutissatut siunnersuuteqarput. Aammattaaq inuusuttut 18-it ataallugit ukiullit sumiiffinni imigassamik tuniniaanermut akuersissutaateqarfiusuni nalunaaqutaq 20.00 kingorna kakaoimik pisisinnaanissaat partiip isumaqataaffigaa.
Taamaattorli IA-mit nalunaarut nutaaq immiaaqqanik, viinninik aamma imigassamik aalakoornartulimmikk pisiniarfinni assiaqusersuinerup peerneqarnissaannut akerliunermik malitseqarpoq.
Ammasarfinnut nutaanut IA akerliusoq
IA, peqqissutsimut naalakkersuisuusimasoq Agathe Fontain aqqutigalugu imigassamut inatsimmik atuutsitsilersut, imigassanik aalakoornartulinnik nioqquteqarnerup ataasinngornermi arfininngornermut nalunaaqutaq 10.00-mit 20.00-imut ammasarfiisa sivitsorneqarnissaannut, Justus Hansenip aamma Randi Vestergaard Evaldsenip Demokraatineersut siunnersuutaannut akerliullutik aamma nalunaarutigaat.
Inuussutissarsiornermut ataatsimiititaliaq ilanngunneqartoq
Siunnersuutit aalajangiiffigineqarnissaat Inuussutissarsiornermut ataatsimiititaliami suliarineqarnissaanik isumaqarlutik, Laura Táunâjip Siumumeersup ilisimatitsissutigaa, tassani Ilaqutariinnermut Peqqissutsimullu ataatsimiititaliaq ilanngunneqarsinnaalluni.
- Taamaattoq maannamut takusinnaareerparput naleqqussagassaqartoq, aammalu allaat allannguisoqaqittariaqartoq, Laura Táunâjik naqissusiivoq.