Markedsføring
Imigassaq pillugu inatsit tusagassiorfinnut akisussaaq
– Inatsisissatut siunnersuummi nunani allamiut inuit attaveqaataanni kalaallinit inissisimalluarnerummata naammaginanngitsumik unammillernissaq siunnersuutigineqartoq, Christian Schultz-Lorentzen, Tusagassiorfimmi Sermitsiaq.AG-mi pisortaaneq oqarpoq.
Ukioq´manna tusagassiuutit naqitat inuit attaveqaataannit atuartartunik piseqqusaarutinillu tigooqqaasunit assorsuaq tatineqarput aamma peqqissutsimut naalakkersuisumit imigassaq pillugu inatsisissatut siunnersuutip nutaap Inatsisartut ukiaanerani ataatsimiinnerani saqqummiunneqartussap aviisit ”illerfissaasa kikiattaassaat” ataatsimik ilaqqippaa.
Aviisi Sermitsiaq taama allaaserisaqarpoq.
Inatsisissatut siunnersuummi § 27-imi imatut allassimasoqarpoq:
– Imigassanik aalakoornartortalinnik piseqqusaarinerit, allagartarsualersornerit allatulluunniit ussassaarinerit inerteqqutaapput.
Atuagagdliutini / Sermitsiami immiaaqqanik, viinninik imigassamillu piseqqusaarisoqarneq ajungajavissorpoq, kisianni Nuuk Ugeavisimi niuertarfeqarfiit viinninik puiaasanik pitsaasunik akuttunngitsumik neqerooruteqartarput.
– Taamatut piseqqusaarutinik annonciliissaarussi tusagassiorfimmut tamanna qanoq annaasaqaataatigissava, minnerunngitsumik Nuuk Ugeavisimut?
– Inatsisinngortussap malitsigisaanik nittartakkakkut aamma Nuuk Ugeavisikkut annoncinit isertitassaraluavut ukiumut 250.000 aamma 500.000 koruunit akornanniittut annaassavavut, Tusagassiorfik Sermitsiaq.AG-mi pisortaaneq, Christian Schultz-Lorentzen, Sermitsiamut oqarpoq.
Fontain nassuerpoq
Agathe Fontainip inatsisissatut siunnersuutimi aningaasatigut kingunerisassai nassuerutigai.
– Siunnersuummi allannguutissat imigassamik tuniniaanermikkut nittarsaassisarnermikkullu iluanaaruteqartartut pillugit nutaanik piumasaqaatitaqarnissaat siunnersuutigineqartoq ilumoorpoq, kisianni meeqqatta pitsaasunik atugaqarnissaat namminersorlutik inuussutissarsiuteqartumit pingaarnerutipparput, Agathe Fontain, oqarpoq.
Allaaserisaq tamaat atuaruk, tassani aamma nunatsinni immiaaraliorfiit inatsimmit eqqugaasussat atuarneqarsinnaavoq. Sermitsiamut digitaliusumut uani linkimi isissutissarsisinnaavutit: