qaarmarsaaneq
Imigassaq ikiaroornartullu pillugit qanoq ilisimasaqartigaat?
pillugit meeqqanut, inuusuttunut angajoqqaanullu atuagaaqqanik saqqummersitsisoqarpoq
Imigassaq ikiaroornartullu pissutaallutik politiit nalunaarutaanni sapaatit akunneri tamaasa peqataasarput. Taamaattumik Naalakkersuisut meeqqanut inuusuttunullu paasititsiniummik saqqummersitsipput Inuuneritta II-mik qulequtaqartumik.
Atuagaaqqani meeqqat inuusuttut angajoqqaallu aanngajaarniutit pillugit ilisimasaqalissapput siunnersorneqassallutillu.
- Atuagaaqqat nutaat aanngajaarniutit pillugit ilisimasat annertunerulernissaannut qulakkeereqataassapput, taamaasillutik meeqqat inuusuttullu ilisimasatik tunngavigalugit peqqinnartunik toqqaasinnaanngussapput, angajoqqaallu meeqqaminnik ilitsersuisinnaanngorlutik tapersersuisinnaanngorlutillu ilisimasassanik pissarsisinnaassapput. Peqqissutsimut inuunerullu naleqassusaanut ajoqutaanngitsumik aanngajaarniutit pillugit qanoq ileqqoqarnissap meeqqanit inuusuttunillu ilikkarneqarnissaa pingaaruteqarpoq, Peqqissutsimut Attaveqarnermullu Naalakkersuisoq Steen Lynge oqarpoq.
Inuusuttorpassuit atuisuusut
Kalaallit Nunaanni inuusuttut qanoq annertutigisumik aanngajaarniutitortiginersut misissuisoqaqqammerpoq.
15-iniit 17-inut ukiullit akornanni hash-imik pujortarsimasut 19 procentiusut, 13-inik ukiullit akornanni aalakoorsimasut 30 procentiusut, 16-ininillu ukiullit akornanni naamaarsimasut 25 procentiusut, misissuinerup takutippaa.
Pinerlutsaaliuinermut Siunnersuisoqatigiit PiSiu suliaminnut atorsinnaasaminnik amigaateqarsimapput.
- Atuagaaqqat PiSiup iliuusissatut siunniussaanut- meeqqat inuusuttullu pingaarnerutillugit sammisaqartumut- naleqqulluarput. Aanngajaarniutit sunniutaannik kingunerisartagaannillu meeqqat, inuusuttut angajoqqaallu ilisimatinnissaat pingaaruteqarpoq, Kalaallit Nunaanni atuagaaqqat taamaattut innuttaasunit piumaneqarnerat PiSiu-mi malugaarput. Taamaammat Peqqissutsimut Attaveqarnermullu Naalakkersuisoqarfimmik suleqateqarneq Siunnersuisoqatigiinni nuannaarutigeqaarput, naammassisallu meeqqanut, inuusuttunut angajoqqaanullu iluaqutaajumaarnissaat neriuutigisarput, assut iluarisimaarparput, PiSiu-mi siulittaasoq politimesteri Bjørn Tegner Bay oqarpoq.