Imigassanut inatsit

Imigassanut inatsit nutaaq kommunimit isornartorsiorneqartoq

Imigassanut aalakoornartunut inatsit nutaaq, Naalakkersuisut tusarniarneqartussanngorlugu nassiussaat, Kommuneqarfik Sermersuumi politikerinit arlalitsigut isornartorsiorneqarpoq.

Niuertarfiit imigassamut inatsit naalagaaniarnertut taagaat

Aningaasanut Inuussutissarsiornermullu Ataatsimiititap tusarniaanermut akissut allassimasaa, aqagu marlunngornermi illoqarfiit pingaarnersaanni kommunimi kommunalbestyrelsimut ilaasortat tusarniaanermut akissut oqaluuserissavaat

Suliniutinut arlalinnut akerliusut
Tusarniaanermut akissuteqaammi allaqqitassami atuarneqarsinnaavoq, inatsisissatut siunnersuutip imarisaanut suliniutinut arlalinnut nutaanut alerliusoqartoq.

Ataatsimiititami amerlanerussuteqartut, imigassat aalakoornartullit nittarsaanneqartarnerat inerteqqutinngornissaanut pilersaarut paasisinnaanngilaat, nunat allat aviisii, atuagassiaat assiliartallillu saqqummersittagaat atorlugit pilerisaarinissaq suli inerteqqutaanavianngimmata.

Atuaruk: Niuertarfiit imigassamut inatsit naalagaaniarnertut taagaat

- Tamannalu equngasoqalerneranik kinguneqassaaq. Ataatsimiititami amerlanerussuteqartut, tamangajammik ataaseq minillugu inerteqqutiginninneq atornagu imigassarli taassumalu sunniutai pillugit, atornerluinermullu pinaveersaartitsineq ilanngullugu paasissutissaqarnerunissaa innersuutigaat, tamanna allaqqavoq.

Annissassarsiniarnermut inatsisit
Ataatsimiititap aamma imigassat aalakoornartullit nerisassanik annissassanik pisiniarnermut atatillugu inerteqqutaalersitsinissaq isumaqatiginngilaa.

- Annissassanik pisinermi imigassat nerisassallu annertussusaat imminnut naleqquppata aatsaat tuniniaasoqartariaqarpoq, tusarniaanermut akissutissami tamanna oqaatigineqarpoq, imalu tunngavilersorneqarpoq:

Unioqqutitsilluni tuniniaaneq
- Imigassamik aalakoornartortalimmik tuniniaanerup inerteqqutigineqarnerani, inatsit naapertornagit imigassamik ilaatigullu hashimik tuniniaasoqarlunilu pisisoqartarnissaa ataatsimiititap ernumanartoqartippaa.

Aamma atuaruk: Imigassamut inatsisissaq isornartorsiorneqaqqittoq: Isertorluni niuernerit iluanaassasut

Ammasarnerit allanngortinnerisigut malunnaateqarsinnaanera ataatsimiititap takujuminaatsippaa. Inatsisissatut siunnersuutip pisiniarfinni nioqquteqarnerit piffissamut nal. 11.00 aamma 14.00 akornannut allanngortinniarpaa - ullumikkumit akunnermik ataatsimik sivikinnerulluni. Imigassamik atuisarnerup ileqqorissaarfigineqarnerulerlunilu pitsaanerulernissaanik suliniuteqarnissaq ataatsimiititamiittut amerlanerit takorusunneruaat

Ataatsimiititaq isumaqanngilaq, inuit 18 inorlugit ukiullit neriniartarfinnut qulit kingorna iseqqusaassanngitsut imigassanik sassaallertoqarpat. Amerlanerit isumaqanngillat neriniartarfinni inuit aalakoortut ajornartorsiutaasut.

Aamma atuaruk: Imigassat ineeqqani immikkoortuni tuniniarneqartalissasut

- Neriniartarfinnukartoqarneq ajorpoq aalakoorniarluni - ilaquttalli ikinngutillu nuannisaqatiginiarlugit pitsaasunillu nerisaqarniarluni neriniartarfiliartoqartarpoq. Meeqqat inuusuttullu aamma inuiaqatigiinni silappaarissumik imigassartorsinnaaneq takusinnaasariaqarpaat, soorlu 17-nik ukiullip inersimasut eqqissisimasunik ajunngitsunillu avatangiiseqarlutik viinnisorlutillu immiaarartortut najussallugit ilinniarsinnaassavaa. Takornarissat meeqqatik ilagalugit kingusissukkut neriniartarfiliarniat siunnersuutip aamma akornusissavai, akissummi allaqqavoq.

Inatsisissatut siunnersuummi suliniutit aalajangersakkat sinneri isumaqatigigaat oqaatigineqarpoq.

Powered by Labrador CMS