atuineq
Imermut kiassarnermullu akit qaffassapput
Kiassarnermut akit appassasut Nukissiorfiit paasissutissiipput.
Aqagumiit atuutilersumik kiassaanermut akigitinneqartoq appartinneqassaaq, kiisalu innaallagissamut aamma imermut akigitinneqartut qaffassallutik.
Akit nutaat akuersissutigineqarsimasut Nukissiorfiit paasissutissiipput.
- Allannguutini uuliap akiata ineriartornera, akit aamma aningaasarsiat nalinginnaasumik ineriartornerat kiisalu Nukissiorfiit ataatsimoortumik aningaasaqarnerannut ersiutaapput, tamatumunnga ilanngullugu ingerlatsinermut tapiissutit ikiliartortinneqarnerata ingerlanneqarnera, Nukissiorfiit pisortaanerat Michael Pedersen tusagassiorfinnut nalunaarummi allappoq.
Atuaruk: Issinnera nammineq aningaasaqarnermut akisusarpoq
Akigitinneqartoq qaffasinnerpaaffiusoq 37 oorinik qaffaaffiussaaq imermullu akigitinneqartoq minnerpaaffiusoq 2 oorinik qaffaffigineqassalluni. Innaallagissamut akigitinneqartoq minnerpaaffiusoq 2 oorinik qaffassaaq, kiisalu akigitinneqartoq qaffasinnerpaaffiusoq 4 oorinik qaffassalluni. Innaallagissamut imermullu akigitinneqartoq 1,13 procentimik 2016-imut sanilliullugu qaffassasoq paasissutissiissummi atuarneqarsinnaavoq.
Kiassarnermut akit appassapput
Ungasianit kiassaanermut akigitinneqartoq MWh-mut DKK 20-nik appassaaq MWh-imut DKK 770-inngorluni, kiisalu kiassaanermut qaminneqarsinnaasumut akigitinneqartoq MWh-imut DKK 10-nik appassaaq DKK MWh-imut 710-nngorlunit.
Taamatuttaaq innaallagissamik aalajangersimasumik kiassaaneq MWh-mut DKK 20-nik appassaaq MWh-imut DKK 770-inngorluni, kiisalu innaallagissamik kiassaanermut qaminneqarsinnaasumut akigitinneqartoq MWh-imut DKK 10-nik appassaaq MWh-imut DKK 710-inngorluni.
Akit Nukissiorfiit nittartagaanni takuneqarsinnaapput.