Atorfittaartoq
Imarsiornermut ilinniartut aqutsisortaalerput
Imarsiornermik Ilinniarfik Paamiuniittoq forstanderertaalerpoq Jeppe Carstensen juulip aallaqqaataani atorfinissammat
Siornatigut imarsiortoq Jeppe Carstensen Imarsiornermik Ilinniarfimmi Paamiuniittumi sulisunut 25-inut juulip aallaqqaataani qullersanngussaaq. Ilinniarfiup siulersuisuisa umiarsuup naalagaatut ilinniarsimasoq taanna forstanderissatut toqqarpaat.
Forstanderinngortussaq imarsiornermut ilinniarfimmit SIMAC-imit Svendborgimiittumit Paamiunut nuuttussanngorpoq. Umiarsuup naalagaatut ilinniakkami saniatigut angallassinermi masteritut aamma imarsiornermi aqutsisutut ilinniaqqittarsimavoq.
Ilinniartut 80-it
Imarsiornermik Ilinniarfimmi siulersuisut Jeppe Carstensen isumalluarfigaat.
- Ilinniarfeqarfinni ilinniartut pisussaaffigaagut ilinniartitaanermik pitsaasumik sunniuteqarluartumillu atorluagassaannik tunissallugit, Imarsiornermut Ilinniarfiup siulersuisui taama nalunaarput.
Naatsorsuutigineqarpoq Imarsiornermik Ilinniarfiup immikkoortui katillugit 80-nik ilinniartoqarumaartut. Aalisartutut piniartutullu ilinniarfik Uummannami ingerlaannassaaq, imarsiornermilu tunngaviusumik ilinniarnerit Paamiuniillutik. Naalaganngorniarluni ilinniaqqinnerit Nuummi ingerlanneqassapput.