ikiaroorneq
Imarsiornermik Ilinniarfiup ikiaroornartoq sakkortuumik iliuuseqarfigaa
Imarsiornermik Ilinniarfik hashimik atuinngisaannarnissamik aalajangiivoq. Forstanderilu atornerluinermut akiunermik annertusaanissamut inassuteqarpoq
- Nalunngilarput Imarsiornermik Ilinniarfimmi maannakkut annertuumik ajornartorsiuteqarluta. Malugisarparput atuartut aamma ilinniartut ikiaroornartumik pujortartarneq ullorsiutigiinnartaraat, ajoraluartumik soorlu nerinertut sininnertullu pisariaqartitatut.
Oqaatsit taakku oqaatigalugit ilinniarfiup forstanderia, Jeppe Carstensen, ilinniarfiup inissisimanera pillugu eqikkaavoq.
60 procentit pujortartartut
- Annertuumik iliuuseqarnerput tunuliaqutaralugu ilisimavarput, tunngaviusumik ilinniartuutitta 60 procentii tikillugit ikiaroornikuusut aamma ikiaroorsimallutik atuarsinnaasartut. Taamatullu aamma officerinngorniat aamma pikkorissartut 25 procentii, forstanderi kisitsisit annertuut ajornartorsiutaanerarlugit tikkuartuivoq.
Inerteqqut
Taamaattumik Iiinniarfik ilinniartunik ikiarooqqusiunnaavinnermik inatsimmik eqqussivoq.
- Imarsiorneq innuttaasunit inuummarliuutilinnut pinnguartarfiunngilaq, qanorluunniit ukiulinnut. Imarsiorneq aamma aalisarneq inuussutissarsiuteqarfiupput aarlerinarnerpaat, tassanilu ikiaroornartut atunngikkaluarlugit sulinerni ajoqusernernik naammattunik pisoqarfiusartoq. Taamaattumik ilinniartoqarfittut qulakkeertariaqarparput, inuussutissarsiuteqarfimmut ilinniartitagut sulinerminni isumannaallisaanikkut illersorneqarluarsinnaasumik tamakkiisumik sulisarnissaat – hashi aamma ikiaroorniutaasinnaasut allat sulinermut taamaattumut attuumassuteqanngivipput, forstanderi erseqqissaavoq.
Sukannernerusumik iliuuseqaqqusineq
Taanna aamma inuiaqatigiit ataatsimut isigalugit sukannernerusumik inerteqqummut tassunga iliuuseqarnissamik kaammattuivoq.
- Inuiaqatigiittut nipituuliortariaqalerpugut oqallisigalugu ajornartorsiuterujussuarput. Aanngajaarniutinik atuineq, ingammik hashimik ajornartorsiutaasoq, angerlarsimaffimmi anaanaasoq aamma ataataasoq, ilinniartitaanermi periuseq, oqartussat aamma suliffeqarfiit, naalakkersuinikkut periutsip sakkortuumik aalajangertariaqarpaat, hashimik atuineq aamma atornerluineq akuersaarneqanngitsoq, Jeppe Carstensen isumaqarpoq.
Sermitsiaq.AG-p hash pillugu allaaserisai tamaasa uani atuakkit