avatangiisit

Imarput pitsaanerusumik illersorneqalissasoq

Immami avatangiisinik illersuiniarluni maleruaqqusat arlallit sukateriffigineqarput

Immami avatangiisinik illersuinissamut inatsit nutaaq Inatsisartut ippassaq akueraat.

Inatsit 3 sømilinut killeqarfiup iluani immami avatangiisinut illersuinermut atorneqassaaq, tamannalu Nunatta oqartussaaffigissavaa.

Umiarsuit unitsinneqarsinnaasut

Inatsimmi nutaatut upalungaarsimanermut mingutsitsinermillu alapernaarsuinermut maleruagassat sukaterneqarsimapput. Taamaasillutik oqartussat aniatitsinissamik uloriarnartorsiorfiusumi aniatitsivioreersumiluunniit umiarsuarnik unitsitsisinnaalernerannik pisussaaffilerneqarput.

- Kalaallit Nunaanni pissutsit, tassungalu silaannaap pissusia, isorartussutsit annertuut, pinngortitaq sunnertiasoq upalungaarsimanermilu atortut killeqartut ilanngullugit, immikkut ittuunerat pissutigalugu, Kalaallit Nunaanni oqartussaasut naliliisarput, umiarsuaq sananeqaatinik avatangiisinut ajoqutaasinnaasunik annertujaanik nassarpat, umiarsuarluunniit motooriminik unittoorpat, imaluunniit arlaannik peqquteqarluni ajutoorpat, sumiiffimmiluunniit uninngaannarsinnaajunnaarpat, aammalu sumiiffini allanngorpat tamatigut mingutsitsinissamut ulorianartorsiortitsisussaasoq, inatsisip nassuiaataani taama allassimasoqarpoq.

- Mingutsitsinermik pinaveersaartitsinissaq, umiarsuarnillu, soorlu uuliamik imaani avatangiisinik mingutsitsisoqartillugu sakkortuumik iliuuseqartarnissaq Naalakkersuisut pingaartippaat, Naalakkersuisut siulittaasuat Avatagiisinullu Naalakkersuisoq Kim Kielsen (S) tusagassiuutinut nalunaarummi oqarpoq.

Umiarsuit qimaannakkat

Inatsimmi umiarsuarnut qimaannakkanut iliuuseqarnissamut taamatuttaaq pisussaaffiliisoqarpoq.

Imaani uumasut takornartat siammarterneqannginnissaat anguniarlugu, imermut oqilaaluttamut maleruagassat sukateriffigineqarput.

Aamma Inatsisartuni danskit imaani avatangiisinik illersuinissamut inatsisaannut nutaamut tapersiipput. Inatsit taanna Kalaallit Nunaanni imartami 3 sømilinut killeqarfiup avataanut atuuppoq. Inatsisit taakku marluk assigiissuteqartorujussuupput.

Powered by Labrador CMS