Aalisarneq
Imaq sikoqanngimmat aalisakkanik tunisassiorneq ingerlalluarpoq
Issaasannera pissutigalugu Ilulissani Qasigiannguanilu aalisartut Royal Greenlandip Ilulissani aalisakkanik suliffissuanut tunisassiassanik nutaanik suli pilersuipput
Avannaani illoqarfiit marluk, Iluissat Qasigiannguillu, eqqaanni imaq sikoqanngilaq.
Tamanna pissutigalugu Royal Greenlandip Ilulissani aalisakanik suliffissuani aalisakkanik tunisassiorneq ingerlalluarpoq.
Ilulissaniit Qasigiannguani aalisakkanik suliffissuarmut tunisassiassanik pilersuineq imaq sikugaangat unittaraluarpoq. Ukioq mannali ukiortaamiilli suliffissuaq tunisassiassanik pilersorneqarpoq, tamannalu aalisartunut iluaqutaasorujussuuvoq.
Tunisassiornermi unammillerneq
Tamanna aamma upernaap ingerlarujussuareernissaa tikillugu Qasigiannguani aalisakkanik suliffissuarmi ataavartumik tunisassiornissamut suliffissaqartitsinissamullu periarfissiivoq, Qasigianngani Royal Greenlandip aalisakkanik suliffissuani pisortaq Hans Grønvold oqarpoq.
– Aamma decembarimi angallammik inuinnarnit pigineqartumik ´Søkongen´-imik tunisassiassanik assartuisoqarsimavoq, unammillernerli pissutigalugu decembarimi tunisassiassanik amerlavallaanngitsunik pisimavugut, rg.gl naapertorlugu Hans Grønvold oqarpoq.
Royal Greenlandip Ilulissani sulifissuani tunisinermi akit qaffanneqarmatali, angallat sapaatit akunnerini kingullerni ulloq allortarlugu tunisassiassanik 10 tonsit 18 tonsillu akornanni amerlassusilinnik assartuisarsimavoq, taanna paasissutissiivoq.
Aalisartunut iluaqutaasoq
Qasigiannguani aalisakkanik suliffissuaq ukiarmi Royal Greenlandip kilisaataanit avataasiortunit qaleralinnik tunisassiassanik 650 tonsinik pilersorneqarsimavoq. Tunisassiassat tamakkua marsip naanissaata tungaanut suliffissuarmi ataavartumik tunisassiornissaq suliffissaqartitsinissarlu qulakkiissavaat.
– Tamanna peqatigalugu maani aalisartuvut Qasigiannguani suliffissuarmut suli tunioraammata januaarip issaasannera aalisartunut, aammalu Royal Greenlandip Qasigiannguani Ilulissanilu suliffissuini tunisassiornermut suliffissaqartitsinermullu iluaqutaalluarsimavoq, Hans Grønvold oqarpoq.
Qasigiannguani aalisakkannik suliffissuaq maanna 70-it missaannik sulisoqarpoq.