Imak: Kusassaajunnaarlusi

Kommuneqarfik Sermersooq aamma ilinniartitsisut peqatigiiffiat Imak isumaqatigiinngittuarsinnarput Kommuneqarfik Sermersuumi atuarfeqarnermi sipaarutissat kingunerisassaat pillugit. Imakimi siulittaasoq Sivso Dorph oqarpoq peqataatitsinissamik isumaqatigiissut Kommuneqarfik Sermersuumit malinneqarsimanngitsoq.,

Kommuneqarfik Sermersuumi borgmesteri Asii Chemnitz Narup Inuit Ataqatigiinneersoq ilisimatitsilluni ataatsimiinnermut aggersaavoq atuarfeqarnermi sipaarutissat pillugit nassuiaaniarluni. Taanna aamma isumaqarpoq ilinniartitsisut akerliussutsimik takutitsineranni sapaatip akunnera kingulleq pisumi Sivso Dorph eqqunngitsumik saqqummiussisimasoq.

Taamaattoq Sivso Dorphip saqqummiussani aalajangiusimavaa.

- Oqalugiaatinni oqaatigivara Kommuneqarfik Sermersuup MISI-mi atorfillit 25 procentimik sipaarniarfigigai. Kommuneqarfiullu tusagassiutini nalaarutaani atorfiit marluinnaat sipaarniarneqartut, tassalu tale-hørepædagogi socialrådgiverilu – (ungaluutini kalaallisut oqaasillit tamarmik). Aammattaaq atorfiit marluk tarnikkut ilisimasalik aammalu allaffissornikkut suliaqartoq inuttalerneqanngillat, namminneq soraarnerat peqqutigalugu. Peqqut suugaluarpalluunniit ulloq manna tikillugu atorfiit taakku suli inuttalerneqanngillat, inuttalerneqarumaaratillu, kingunerivaalu atorfiit sisamat MISI-mi ikinnerulermata.

Atuarfimmi ilikkarnikuuvara 16-t sisamaraarterutaata assigigaa 25 procent.

Taamaattumillu atuartut immikkut pisariaqartitsisut sullinniarnerat ajornerulissaaq, Sivso Dorph oqarpoq.

Ilinniartitsisunit soraarsitsineq

- Naqissuserlugu erseqqissaatigissavara oqarsimanngisaannarama ilinniartitsisut 16-t soraarsinneqassasut. Atuarfinniliuna ilinniartitsisunut forvaltningip paasissutissiinerata tamanna pilersikkaa.

- Siullerpaamik ataatsimiinnermi forvaltningip Imak-mut uku saqqummiuppai ”2014-ni naappat ilinniartitsisut 15-16 ikinnerulersimassapput” Imakip oqariartuut tamanna atunngisaannarsimavaa, akerlianilli Imakp misissorpai Kommuneqarfik Sermersuup ukioq atuarfiusoq 2013/14-mi paasissutisssat nassiunneqartut. Tassunga tunngatillugu Imakip paasivaa ilinniartitsisunik pisariaqartitanit ikinnerusut atorfeqartut, tassami ilinniartsitsisut amerlasuut qaangiuttoornertalimmik sulimmata, Sivso Dorph oqarpoq.

Taamaattumik Imakip kommuni ataatsimeeqatigineratigut uparuarsimavaa ilinniartitsisunut taamatut paasissutissiineq kukkunerusoq unnerpaa.

Taamatut oqalunnermi paatsuungatitsineq forvaltningip kisimi pilersitaraa.

- Imakip arlaleriarluni kommuni ilisimatippaa taamatut kommunip sipaarniarnnermini aallaavigisimasaa 2013-mi atuisimanermiit aallaaveqartoq, naak ukioq atuarfiusoq 2014/15 ilinniartitsisut pisariaqartitassat aallaviusussaasimagaluartut inatsit unioqqutissanngikkaanni, ilinniartitsisut siulittaasuat oqarpoq.

- Ukioq aallaaviusussaq kommunimit eqqortumik naatsorsorneqarsimagaluarpat, Imak naliliivoq toqqissisimannginneq nalorninerlu pinngitsoorneqarsimassagaluartoq.

Toqqissisimannginneq nalorninerlu Imakip ilinniartitsisullu pilersinngilaat, kisiannili kommunip forvaltningiata.

Suleqatigiisitaliat
- Imakip nalornissutiginngilluinnarpaa Kommuneqarfik Sermersuup suleqatigiinnermut oqartussaaqataanermullu isumaqatigiissut unioqqutissimagaa. Isumaqatigiissummi allaqqavoq aningaasaqarnermut tunngasunik il.il. suleqatigiit ataavartumik siusinaartumik paasitinneqartassasut, isumaallu tusarniarneqarluni aalajangiisoqannginnermi, taamaattoqarsimanngilarli. Hovedsamarbejdsudvalgi decemberimi paasitinneqarpoq, sipaarniarnissarli oktoberimili ilisimatitsissutigineqareersimavoq. IMAKi suleqatigiissitaliat paasitinneqarsimannginnerinik uparuaateqarmat, aatsaat suleqatigiisitaliat paasitinneqarput. Sipaarniarnissarli aalajangiunneqareersimavoq.

Aalajangiisoqannginnerini suleqatigiit ilaatinneqarsimasuuppata, politikkerit pitsaanerusumik immaqa tunngavilimmik aalajangiisimassagaluartut.

- Aammattaaq Kommuneqarfik Sermersuup neriorsuutiginikuuaa Qorsussuaq matuneqarmat, suleqatigiinneq aammalu oqartussaaqataaneq malinneqassasut. Taamaattumik IMAKip eqqumiigilluinnarpaa, sooq ataatsimiisitaliat kommunalbestyrelsillu suleqatigiissitaliat oqaaseqaataat sipaarniarneq pillugu ujartorsimannginnerai, Sivso Dorph oqarpoq.

Toqqissisimannginneq nalorninerlu
Imakip naliliinera malillugu angajoqqaat, ilinniartitsisut aqutsisullu akornanni toqqissisimannginnermik pilersitsisoqartoq, toqqissisimannginerlu pinngitsoorneqarsinnaagaluartoq, forvaltningip isumaqatigiissutit atuuttut malissimasuuppagit, aammalu pisut kusanartumik ingerlanneqarsimagaluarpata.

- Akerliussutimik takutitsinermi oqarnittuut, Imakip kommuneqarfik Sermersooq kaammattussavaa piviusut aallaavigalugit oqaloqatigiinneq pissasoq. Minnerunngitsumillu suleqatigiit akuutinneqarnissaat isumaqatigiissutit malillugit - taamaalilluni meeqqat atuarfiini atuartunut pitsaanerpaamik sunniuteqarniassammat, Sivso Dorph oqarpoq.