IMAK-imi siulittaasoq qimusserluni ulorianartorsiorsimasoq

Ilinniartitsisut kattuffiani siulittaasoq, Karl Frederik Danielsen, 2012-imi Kangaatsiap Atuarfiani pisortatut suliartorluni Kangaatsiamut nuukkami, Ilulissani Avannaata Qimussersuanut peqataaniarluni anguniagaqarpoq.

Taassuma siornatigut Tamanumut oqaluttuarinikuuaa, Uummannamit nammineerluni qimmini qanoq umiatsiamik angallannikuunerlugit, 40 kilometerisut isorartutigisumullu qimusserluni peqataanissamut anguniagaqarneranut qimmiata ataatsip siutaata ilanngarnera pissutaaqataasimasoq.

Siku qituleraartoq
Ilinniartitsisut kattuffianni siulittaasup maanna anguniagaqarnini toqqutigingajassimallugu oqaluttuaraa.

Atuaruk: Qimmit qimuttut ilisimatusartunit misissorneqassapput

Siulittaasup Uummannami 1971-imi inuusimasup qimussimik sukkaniuunnermut aappassaanik peqataaniarluni sungiusarnerani tamanna pivoq. Perluttorsuarmi qanoq tammariasaarsimanerluni suliaqaqatigiit atuagassiaanni pissanganartumik oqaluttuarpoq.

– Siku qamutima ataani qituleraalerpoq. Kangerluit marluk paarlaassimavakka, sikup sinaavanullu pisoorsimallunga. Uteraluarpunga isigisaqarsinnaanangali. Perluttorsuuvoq, anorilu sakkortungaarmat qimmit tingitaangajavittarput, Karl Frederik Danielsen taama issuarneqarpoq.

Qimmit kissassaatigalugit
IMAK-imi siulittaasup 2001-imi ilinniartitsisunngortup qujanartumik qanoq iliussanerluni nalunngilaa.

- Kiisa qamutit uppisittariaqalerpakka, qimmillu akornannut tuttup amianik allequtserlunga allamillu qipillunga innarlunga. Qujanartumik ulloq taanna 14-iinnarnik issippoq, sivisuumik -30 C-inik ississimagaluartoq, taanna oqaluttuarpoq.

Kiinnamigut ajoqusertoq
Akunnerni pingasuni-sisamani ingerlaqqissinnaanngornissami tungaanut tassaniippoq. Qamuteralaat aqqutigisimasaannik illoqarfiup tungaanut malissinnaasaminik nassaarpoq. Naak aniguigaluarluni kiinamigut ajoquserpoq.

Atuaruk: Ilinniartitsisut eqiasuttut amerlavallaarput

- Sunaaffa kiinnakkut sakkortuumik qerutsitersimallunga. Qerussornerimmi ingerlaannaq malugisassaaneq ajorput. Aatamma inuuniapiloornermi eqqissisimaniartarnissamik ilinniartinnikuuaanga, tamannalu ulloq taanna iluaqutigivara. Misigisaq sakkortoqaaq, Karl Frederik Danielsen oqaluttuarpoq.

Upperinninneq
Karl Frederik Danielsen atuarfimmik aqutsinermi ineriartortitsinermilu Ph.D-eqartoq, ukioq ataatsip matuma siorna Sivso Dorphimut kingoraartissatut toqqarneqarami, inuunerup isumaanut tunngasumik qineqqusaaruteqarpoq.

- Ilinniarninnili aamma sulininni unammilligassat tamarmik aaqqinneqarsinnaasut aporfiunngitsullu isumaqartarpunga, taamani taanna oqarpoq.

Imminut tatigineq annertusiartortoq
Allaaserisaq naapertorlugu Karl Frederik oqarpoq, 'misigisamit nukittorluni aniguisimalluni, imminut tatiginera nukittorsimavoq, nukik IMAK-imut siulittaasuunermini atortagaa.'

Taanna 2014-imi Avannaata Qimussersuani normu 31-iulluni apuuppoq, piffissaq 2:41´27 atorlugu.