Imaanik itissusersiuineq aallarteruttorpoq
Sakkutuut imarsiortut immikkoortoqatigiit marluk aasaq naallugu kitaani sumiiffinni sisamani itissutsinik uuttortaassapput
Nunatsinni umiarsuit immap itissusaanik uuttortaasartut aasaq manna ulapissapput. Kitaani sumiiffinni sisamani itissusersiuissapput, umiarsuillu, Birkholm aamma SKA 12, upernaamit septembarimut itissutsinik ikkarlunnillu nalunaarsuipput, Sakkutuut imarsiortut Sakkutuut qullersaqarfiata nittartagaani oqaluttuarput.
Manna tikillugu Nuup Kangerluani uuttortaasoqarsimavoq, London Miningip Isuani piiaaffissaata eqqaani imaq uuttortarneqarsimalluni. Tamanna pivoq Qussummi, umiarsualiveqarfissami. Tamatuma kingorna umiarsuit Sisimiut avannaannut nuupput, tassani Andenfjordip avannaani nunap iluatigut aqqutip itissusia uuttortarneqarluni. Tamanna peqatigalugu Birkholm-ip SKA 12-illu Nordre Isortup paava itissusersiorpaat.
Ukioq manna itissusersiugassat allat tassaapput Napasup eqqaani Maniitsup Nuullu akornanni nunap iluatigut aqqutit, kiisalu Nuup avataani Kitsissut avataat itissusersiorneqassaaq.
Septembarip aallartinnerani itissusersiornerup naammassinnginnerani Paamiut kujataanni Narssallip aamma Nordre Kangip akornanni nunap iluatigut aqqut itissusersiorneqassaaq.
Umiarsuit sumiiffik tamaat kaajallallugu itissusersiortarput ikkarlunnillu nalunaarsuillutik, quppernermi nidtartakkami allassimavoq, tassanilu aamma siorna itissusersiuinernit takusassaqarpoq.