tusagassiortunik katersortitsineq
Imaani isumannaallisaaneq pillugu tusagassiortunik katersortitsineq annertooq
Politiit Issittumi Sakkutooqarfik, Naviair aamma Imarsiornermik Ilinniarfik suleqatigalugit tusagassiortunik katersortitsissapput, tassani imaatigut angallannermi isumannaallisaarneq pillugu, aamma SAR-imi annaassiniartoqannginnissaa qanoq pinngitsoorneqarsinnaanera pillugu ilisimasanik paasissutissanillu siammarterissapput
Marlunngornermi maajip aappaani imaatigut angalanermi isumannaallisaaneq pillugu tusagassiortunik katersortitsisoqassaaq, imaatigut angallannerup aallartingajalernera pissutigalugu.
Nuummi politiit, Issittumi Sakkutooqarfik, Naviair aamma Imarsiornermik Ilinniarfik tusagassiortunik katersortitsitsissapput.
Ilisimasanik siammarteriniartut
- Ataatsimoorluni imaatigut angallannermi isumannaallisaanermut ilisimasat aamma paasissutissat siammarterneqarnissaat, imaluunniit SAR-imi annaasiniartoqarnissaa qanoq pinngitsoorneqarsinnaanera tusagassiortunik katersortitsinerup siunertaraa, Julie Senderovitz Bendtsen politiineersoq tusagassiuutinut nalunaarummi allappoq.
Imarsiornermik Ilinniarfiup aamma sillimaniarnermut atortunik takutitsissapput, taakku angalanermi isumannaallisaanermut atorneqarsinnaapput.
- Politiit aamma Kalaallit Nunaanni 2016-imi imaatigut angalasunik annaassiniaanerit qanoq amerlatiginersut oqaluttuariniarpaat, Julie Senderovitz Bendtsen nalunaaruteqarpoq.
Tusagassiortunik katersortitsineq Nuummi politeeqarfimmi maajip aappaani nalunaaqutaq 10.00 pissaaq.