juullimut nangeqattaartoq

Ima juullisiussaanga

Juullernissaanut kisitsivugut. Ullumikkut Aviâja Egede Lynge pulaarparput

Aviâja Egede Lynge orpinnik sapigaqarpoq, plastikkimillu peqartariaqartarpoq. Uani ataani angerlarsimaffiani juullerpaluttut takukkit
Indsendt af Aviâja Egede Lynge Indsendt af Aviâja Egede LyngeAviâja Egede Lynge orpinnik sapigaqarpoq, plastikkimillu peqartariaqartarpoq. Uani ataani angerlarsimaffiani juullerpaluttut takukkit Privat Indsendt af Aviâja Egede Lynge Indsendt af Aviâja Egede LyngeAviâja Egede Lynge orpinnik sapigaqarpoq, plastikkimillu peqartariaqartarpoq. Uani ataani angerlarsimaffiani juullerpaluttut takukkit Privat Indsendt af Aviâja Egede Lynge

Sermitsiaq.AG juullernissaanut kisitsilluni tamatta ilisarisimasatsinnut alakkaqataarpoq. Naaja Nathanielsenimit aallartippugut. Ullumikkut meeqqat illersuisuat Aviâja Egede Lynge MIO-meersoq pulaarparput.

Ukioq manna qanoq juullisiussavit?
Ukioq manna uannut nalinginnaanngitsumik juullissaaq. Suli sulinngiffeqarluta angalannginnatta, panippullu AFS-eriarluni aasaaru aallartussaammat, taava ilaqutariiulluta USA-mut angalaqatigiinniarluta aalajangerpugut. Piffissaqarfigilluarlugu ilaginissaa suliffigullu qimalaarnissaat qilanaaraarput. Taamaammat ukiormanna juulli sungiusimasatsinnit allaanerujussuussaaq. Pisarnitsitut piareersarujussuassanngilagut, uangalu nerisassiussanngilanga.

Sumiissavit?
New Yorkimukassaagut, tassani panigalu 2014-imi najugaqarnikuuvugut. Kisianni juullimi North Carolinaliassaagut, tassanilu panima ataataata AFS-erluni angajoqqaarsiai ilaqutaallu juullisioqatigiartorlugit.

Juullimi suut ileqqoraagit
Ileqqorpassuaqarpunga. Juullernera nuannareqaara. Paniga mikigallarmalli ammartakkanik ullorsiuteqartittuaannarpara, nissiaqqallu nunaannik peqarpugut. Nissiaqqat nunaanni nissiaqqanik mikisunik panimma meeraaneraneersunik peqarpugut, nissit nunarsuarmi angalasarnitsinneersut, nissit aanagigaluama sanaarisimasai, nissit ilaquttatsinnut attuumassuteqartut allallu.

Kaagit pinnersaasikkat
Kaageeqqanik pinnersaatilerujussuarnik iffiortarpugut. Paniga maanna 15-inik ukioqalereeraluartoq, tamakku utoqqalinissama tungaanut ingerlanniarlugit eqqarsarpunga. Juullerpaluttut karsinit qaqikkaangatsigit, juullerpaluttut oqaluttuassartaat eqqaallugit nuannarisaqaarput.

Putut naneruutillit
Ilaquttat ullaakkorsioqatigisarpagut. Meeraallunga aanaami aataamilu ullaakkorsioqatigiittarnikuuvugut. Juulli meeqqanut tunngajuaannarpoq, ullaakkullu ammaasarpugut. Aanama ukioq naallu naneruutinik sinnikuinik katersisarnera nuannerpaasarpoq. Juullip ullaavani pisarpakka, ilaquttallu agginnginnerini illup silataani putunut naneruusersuisarpunga.

Imigassartaqanngitsoq
Meeraallunga imigassaq juullimi nalaannikuunngisaannarpara, taannalu uanga ingerlateqqippara. Ullaakkut ileqquliussarput allanngortinnikuarput, maanna ullaakkut poortukkamik ataatsimik ammaasoqartarpoq, sinneri unnukkut orpiliareernermi ammarneqartarput.

Nerisassat assigiinngitsut pingasut
Savaarartortarpugut, aqissit waldorfsalatilerlugit aamma tuttu. Ilaqutariit nerisassiornermi ikioqatigiittarput, suliassat agguataartarpagut. Ullukkut eqaluit seernartulikkat allallu aasaanerani pisagut mamartut nerisarpagut.

Orpinnik sapigaqartoq
Juullip orpia plastikkimik orpiliamik taarserneqarnikuuvoq. Orpilissap tikka maqaaseqaara, kisianni ajoraluartumik sapigarilernikuuara. Orpiliaq unnukkut decembraip 23-anni pinnersarneqartarpoq. Paniga allinikuunermut maanna pinnersaaqataasarpoq. Mikigallarmat sinileraangat pinnersartarnikuuarput.

Tunissutissanik nassaallaqqittuullunga isumaqarpunga. Tunissuteqarneq nuannareqaara. Juulli sioqquterujussuarlugu pisisinnaasarpunga. Juullilernerani ulapinneq nuannarinngilara, juullimullu suliassanut piffissaq kingulleq atorlugu nuannarinngilara.

Toqoreersunut tussiarneq
Orpiliarnermi tussiartuaannarpugut. Tussiutit nuannarisagut, kisianni aamma tussiutit ilaquttat toqoreersut nuannarisaat. Taamaammat juullip unnuani ilagiuaannarpaatigut. Ukiuni kingullerni panimma aanakkui aatakkui ilaginissaat pingaartittaqaarput. Qanoq sivisutigisumik najussanerlugit nalujuarparput, ilagitillugit nuannaaqatigiuarniartarpagut. Juullimi naleqartitani taakku pingaarnerpaapput: meeqqat aanaakkut aataakkullu.

Tunissutissat uannut pingaarnerpaanngillat. Asasakka ilagigukkit naammappoq.

Powered by Labrador CMS