juullimut nangeqattaartoq

Ima juullisiussaanga

Juulliararnissaanut ullunik kisitsiuarsinnarpugut. Naaja Nathanielsenimullu pulaaqqaalaariarta.

- Juulli pineqartillugu ingasattajaalaarsinnaasarpunga, Naaja Nathanielsen nassuerpoq.

Juulli ilaqutariinnut ataatsimoorfiullunilu nuannataarfiusarpoq. Ilaqutariit ilai juulliaqqap ullaavani poortukkanik ammaasarput ilaallu unnunnissaanut utaqqisarlutik. Amerikarmiusulli aamma pisoqartarpoq, tassa juullimi aatsaat poortugannatsitsillutik.

Juullimi nereqatigiinnissamut aamma ilaqutariinnit ilaqutariinnut apeqqutaasarpoq. Sava, umimmak, tuttu, puuluki siataq, aqissit qeerlutuullumi iganeqartarlutik.

Juulliaqqamut Sermitsiaq.AG ullunik kisitsilluni ilisarisimaneqarluartunut pulaallattaassaaq. Pinerluttunik isumaginnittoqarfimmi pisortaq Naaja Nathanielsen siullillugu pulaarparput.

Ukioq manna juulli qanoq atussaviuk?

Avinneruvunga ukioq mannalu meeqqakka angumminni juullisiussallutik. Ullukkut ilagilaassavakka poortukkanillu tunioraateriarluta alianaarsaassalluta. Juulliaqqallu unnukkuani qatanngutinnut ningaannullu anaanaga ilagalugu neriartussalluta. Soralussannut atasorujussuugama juullisioqatigisinnaagakkillu tunissutaavoq uannut.

Juullimi suut ilitsoqqussaraagit?

Juulliaqqami naalagiartuaannarpugut. Guuterpullu tussiareeraagakku aatsaat juullisiorsinnaanngortarlunga. Ilaquttakkalu naalagiaqatigiittarpugut taamaasilluta ilaqutariiusugut naapissimatilluta juullernera malunnarninngortarluni.

Juulliaqqami suut nerisarpigit?

Nerivallaartarpunga! Unnukkut savatuuttarpugut iggiserlugu.

Kina nerisassiortarpa?

Amerlanertigut anaanaga, iggarissorsuugamimi. Uanga iggarinnerpaannginnama rødkålinik salatiliaq suliassarisarpara, nalunanngingaarmammi iluatsittuaannarakku. Ris a la mandenillu kinguleraqartarpugut. Ataatama peerunnerata kingorna Ris a la mandeni qaqqortarissamik nassaartup pinnattaassaa isumagisalernikuuara, poortukkanillu marlunnik pisisarlunga: meeqqamut inersimasumullu. Neriuutigisarlugulu qaqqortariaq meeqqamit nassaarineqassasoq inersimasumut tunniussassaraluara nammineq piinnarsinnaaniassagakku (hehe)

Orpiliaq qaqugukkut pinnersartarpisiuk?

Decembarip 23-ani.

Qaqugukkut poortukkanik tunioraattarpisi?

Juulliaqqap unnukkuani orpiliaq kaavereeraangatsigu.

Tunissutissanik ujarlillaqqippit?

Tunissutissarsiniarneq nuannareqaara. Tunissummi nuannarineqassaguni akisusariaqanngilaq. Soorlu ernera qaammartartuaqqamik tunitikkami tunissutisiami sinneri ammarumajunnaavinnikuuai. Unnuullu sinnera seqertaarilluni suna tamaat qaammartartutaaminik qinnguartaqattaarnikuullugu.

Poortukkat orpiup ataaniittarpat?

Nerereernerup kingorna orpiup ataanut iliorartarpagut. Orpiullu kaavinnerani pissittaqattaartariaqartarluta, ledninginut naangajanngikkutta poortukkanut naattarluta.

Erinarsortarpit? - Suna erinarsuut nuannarinerpaaviuk?

Uggornaraluartumik erinarsortarpunga. Erinarsuutillu juullerpaluttut qanoq innera aallaavigalugu erinarsortarlugit. Juulliaqqamili Michael Bublép atugaa "All I want for christams is you" tusarnaajutigalugu erinarsoqataasarpunga.

Orpimmik kaaveqataasarpit?

Aap. Erinarsuutit pingasut sisamat toqqartarpagut, taamaammat sivitsortoorsinnaasarluta. Danskisut kalaallisut tuluttullu erinarsortaratta. "Kaavitta kaavitta kaavinniarta" "Nu er det jul igen" naggasiutigisarpagut.

Sumik tunitinnissat neriuutigaajuk?

Decembarimi inuuissiortarama kissaatigisakka tunissutisiarereerpakka. Nasaqarpalli nutsanut tukatsitsineq ajortumik pitaarerusussinnaagaluarpara.

Tunissutisiatit taasertittarpigit? Pigiinnartarpigilluunniit?

Apeqqutaavoq. Tunisutisiara naammaginngikkukku taarsertittarpara.

Juullisiortarnerit allanit qanoq aallaanerussuteqarsoraajuk?

Juulli pineqartillugu ingasattajaalaarsinnaasarpunga. Septambarip qaammataani julekortisiniarlunga aallartereertarpunga, halloweenereerniariartorlu illip iluani silamilu qulleeralersulereertarlunga. Pinnersaatissanut isumassarsiniarneq quppersakkani nittartakkamilu sivisoorujussuarmik piffissartorfigisarpara. Nipilersuutaateqarlungalu juullerpaluttunik uteqattaangaatsiartakkanik. Ukiumimi juulleriartornera nuannernerpaasarmat.

Powered by Labrador CMS