Ima amerlatigisut ´Kalaallit Nunaat Tivolimi´-ipput

– Ukioq manna ´Kalaallit Nunaat Tivolimi´ iluatsilluartorujussuuvoq. Ulluni taassuma ingerlanneqarfiani silagissimavoq nuannisarluartoqarsimallunilu.
Taamatut naliliivoq Kalaallit Nunaat Tivolimi suliniuteqarnermut pisortaq Miki Jensen.
Sapaatip akunnerani kingullermi pingasunngornermi sisamanngornermilu aaqqissuussineq nuannarineqarluartoq ingerlanneqarmat inuit katillugit 52.000-t Tivolimiissimapput.
– Naliliivugut taakkunannga ukiuni siuliinisut 15.000-t missaanniittut Kalaallit Nunaat Tivolimi piinnavillugu takkussimassasut. Taama amerlatigisut takkussimanerat aqutsisoqatigiinnit tulluusimaarutigisorujussuuvarput, Miki Jensen oqarpoq.
– Tamatuma saniatigut kalaallit tuniniaaviini tunisaqartoqarluarsimavoq, sisamanngornermilu tusarnaartitsinerni tamani Plænen-imi scene ornigarneqarluartarsimavoq.
Suliniutit nutaat anguniakkallu
– Ukioq manna pingaartissimavarput Kalaallit Nunaat Tivolimi tassaannaassanngitsoq Plænen-imi nuannarineqartunik tusarnaartitsinerit. Kalaallit Nunannit kulturimik sunik tamanik pikialaartitsiffiussaaq. Taamaattumik ukioq manna nutaanik arlalinnik suliniuteqarsimavugut ilaatigut meeqqanut tivanermik pikkorissartitsineq, erinarsoqatigiit Tunumeersut Kitaaneersullu, filminik takutitsinerit, isiginnaartitsinerit quiasaarinerillu. Kikkunnut tamanut aliikkusersuisoqaroq meeqqanut, inuusuttunut, inersimasunut utoqqarnullu. Tamannalu siunissami ingerlatiinnarusupparput.
– Kalaallit Nunaat Tivolimi-mi anguniagaraarput suliniutinut nutaanut pitsanngorsaanernullu tamatigut inissaqartassasoq. Unammisitsinitsinni takkuttorpassuit aperaavut aappaagumut suut misigerusunneraat. Siunnersuuterpassuillu 2014-imi programmimut qularnanngivissumik sunniuteqassapput, Miki Jensen nassuiaavoq.
Siorna 57.000-t
2012-mi Kalaallit Nunaat Tivolimi-mut takkussimapput 57.000-t. Miki Jensenilli nassuiaaneratut naatsorsorneqarsinnaanngilaq qaoq amerlatigisut kalaallit aaqqissuussaat piinnavillugit takkussimanersut.
´Kalaallit Nunaat Tivolimi 2013´-imit allaaserisat assillu tamaasa takukkit