Ilumoorpa ilumuunngilaluunniit, Jens-Erik?

Nutaarsiassaq ilumuunngitsoq, ataaseq allappoq, allat allattut saviminissamik piiaaffik piviusunngortinneqassappat tamatuma kingunerissagaa kangerluup uumassuseerunnera. Taamatut oqaaseqarfigineqarpoq allaaserisaq "Saviminissamik piiaaffik piviusunngulerpoq", arfininngornermi juunip 15-ianni ilanngunneqartoq. P1 Orientering-imit paasissutissiissutit malillugit allaaserisami oqaluttuarineqarpoq saviminissamik piiaaffimmut suliniutilimmut, London Miningimut, - aamma Isuani suliniutitut ilisimaneqartumut, akuersissut juunip 27-anni tunniunneqassasoq.
Paasisaqarfittut pingaarnertut Naalakkersuisunut ilaasortaq Jens-Erik Kirkegaard apersorneqarpoq.
Allaaserisamulli siuliani taaneqartumut oqaaseqaatitut Jens-Erik Kirkegaard oqaaseqartarfimmi allappoq:
– Ulloq taaneqartoq, juunip 27-at, tusagassiortup uannut apeqqutigisaraa, taamaattumillu isumaliutersuutaannartut isigineqassaaq. Tassa ulloq taanna uanga saqqummiussarinngilara. Tamannali aallakaatitassiami ersarissumik oqaatigineqanngilaq!
Ilisimaneqartutulli naalakkersuisut anguniagaraat qinnuteqaatip taassuma ulluni atuuffimminni siullerni 100-ni isummerfigineqassasoq...
Taamaariarmat IA-p aatsitassanut oqaaseqartartuata Naaja Nathanielsenip piumasaraa Jens-Erik Kirkegaardip aallakaatitassiami kukkusumik issuarsimaneqarsimanerluni erseqqissassagaa imaluunniit ilumuunnginnerassagaa:
– Nunap aatsitassanut Naalakkersuisua aallakaatitami kukkusumik issuarneqarsimappat isumaqarpunga tamanna Namminersorlutik Oqartussanit ingerlaannavik ilumuunnginnerarneqassasoq imaluunniit erseqqissaneqassasoq, Facebook-imi oqaaseqaaterfigiinnarnagu. Arlaliugunarpugut qallunaat tusagassiorfiannit nalunaarummik tamatuminnga tupaallattorujussuit. Taamaattumik qilanaaraara pisortat nunami innuttaasunut pisortatigoortumik paasissutissiinissaat, Naaja Nathanielsen allappoq.

Siuliani pineqartoq oqaaseqarfigitinniarlugu Jens-Erik Kirkegaardip ministeritut allattaa Sermitsiaq.AG-p attaveqarfigisimavaa.