Ilulissat: Nakuuserluni ujajaasoqarneranut ilisimannittunik ujaasineq

Pisiniarfimmi nakuuserluni ujajaasoqarneranik Ilulissani politiit ilisimannittunik ujaasipput.

Tallimanngornermi maajip sisamaanni Ilulissani politiit Butik Nivimut aggersarneqarput.

Politiit nalunaarutaat naapertorlugu, siullermik aggersaaneq persuttaanermut tunngatinneqarsimavoq, kisianni kingorna paasineqarpoq ujajaanermut persutaanertalimmut tunngasoq, tassani pisumi sulisoq qallumigut kilersimavoq arlalinnillu tilluusartiterluni.

Ujajaanerup kingorna pinerluttut marluk imigassat aalakoornartut cigaretsillu nassarlugit qimagussimapput.

Ilulissani politiit pisoq sakkortooq pillugu takunnissimasinnaasunik ujaasipput. Taamaammallu Tallimanngornermi nalunaaqutaq 16:00 sioqqutilaarlugu, 16:00 nalaani imaluiunnit kingunerani angutit marluk takuneqarsimappata nalunaallaquneqarput.

Pinerluttut marluk imak ilisarnaateqarput:

A: Angut 185 cm angissusilik. Oqorutit puuatut isikkulimmik atortoq, isarualik. Kamippaat Salomon-it, pisup nalaani qisummik anaartaammik nassatalik.

B: Angut, 170 cm angissusilik saluttoq isarualik, siumut peqingalaartoq. Qernertumik qaatigooqarluni, qernertunik qarlilik, qernertumillu nammattagalik. Pisup nalaani aappilasumik annoraaminermik kiinnani assersimmasimavaa.

Angutit taakku marluk pillugit ilisimasallit politiit tusarfigerusuppaat. Aammalu taassuma pisup nalaani aamma takunnissimasinnaasut paasisaqarfigerusuppaat. Nalunartut pillugit aamma tusarusuppaat arlaata festerluni inuit cigaretsinik imigassanilluunnit tunioraasunik takunnissimasoqarnersoq.

Ilulissani Polititt uunga attavigineqarsinnaapput oqarasuaat 701422.

Powered by Labrador CMS