Ilulissat: Kiinnaminik assiaqutsiisimasoq pisiniarfimmut ujajaasoq
Ilulissani ujajaasup Butik Nivimi arnaq sulisoq qunusaarpaa arfininngormat unnukkut. Ujajaanermut atatillugu takunissimasinnaasut ilisimannittuulluunniit politiit ujaasipput
Butik Nivimi ujajaasoqarsimaneranut politiit nalunaarfigineqarput arfininngormat nalunaaqutaq 21.56.
- Nalunaaquttap 21.30-ip missaani Butik Nivimut ujajaasoqarsimasoq politiinit paasineqarpoq. Ujajaasup kiinnani assiaqutsersimavaa, pisiniarfimmilu arnaq sulisoq qunusaarlugu, aningaasanillu piumaqarluni. Taamaasereersoq ujajaasoq qimaavoq, politiit tusagassiutinut nalunaaruteqarput.
Tillinniaq ima isikkoqarpoq:
Angut kalaaleq - kalaallisut oqaluppoq, ukiua naluneqarpoq, 175 – 180 centimeterit missaannik angissusilik. Qernertumik kavaajaqarpoq, taartunik qarleqarluni, qenertunik kamippaqarpoq, kiinnani assiaqutseqqallugu, isaruaqarlunilu. Qernertumik taskeqarpoq.
Peqqarniitsumik ujajaasoqarsimanera pissutigalugu politiit annertunerusumik paasisaqarusupput. Taamaattumik ujajaanermut ilisimannittut takunnissimasulluunniit ingerlaannaq politiinut saaffiginninnissaat qinnuigineqarpoq.
- Ujajaasoqannginnerani, ujajaasoqarnerani ujaareernerulluunniit kingorna takunnissimasut aamma politiinut saaffiginneqquneqarput. Butik Nivip eqqaaniissimasut aamma politiinut saaffiginneqquneqarput, politiit tusagassiutinut nalunaaruteqarput.
Ilulissani politiit uunga sianerfigineqarsinnaapput: 70 14 22.