Ilulissat: Innuttaasup eqeersimaartup tillinniat paasineqarnerannut

Ilulissani innuttaasup eqeersimaartup tillinniat nalunaarutiginerisa kingorna, marlunngornermi unnuakkut tillinniat marluk tigusarineqarput, taakku niuerniarfimmit tillitanik puussianik peqarsimapput.

Ilulissani politiit marlunngornerup unnuaani tillinniat marluk nal. 02.00 missaani tigusaraat, taakku Centermarkedetimut tillinniaqqammersimapput.

- Ilulissani centermarkedet tillinniarfigineqarsimasoq siullermik nalunaarfigineqarput, tullianilu inuk puussiamik cigarettinik aamma imigassanik aalakoornartunik imalimmik nassataqartoq pillugu sianertoqarpoq, taakku centermarkedetimi tillitat ilagaat.

Ilulissani politiini politikommissær, Sebastian Leonhard Bech, tusagassiuutinut nalunaarummi taama oqarpoq.

Sebastian Leonhard Bechip oqarnera naapertorlugupolitiit taamaalillutik piaartumik adressemukarsinnaasimapput, inuillu taakku marluk, tamarmik angutit, aappaa 38-nik aappaalu 27-nik ukiulik, tillitanik kiisalu tillinniarnermi sakkugineqartunik tigummiaqarput.

- Inuit taakku marluk unnerluunneqarput, aappaalu tunngaviusumik inatsit tunngavigalugu killisiorneqareerluni ulluni 28-ni tigummigallarneqartussanngorpoq. Pinerlussimasutut eqqartuunneqarnissap saniatigut pinerluuteqartutut pasineqartut pisiniarfimmi tillinniarnerminni aserortikkaminnut aammalu tillitat nassaarineqarsinnaanngitsunut taarsiinissaat piumasarineqassaaq, Sebastian Leonhard Bech oqarpoq, taassumalu ilisimatitsissutigaa, taakku tillinniartut pinngitsuunerarsimasut.

Pingajuat aamma unnerluunneqassaaq

Inuk aamma tillinnianik pulaartoqartoq, tillitanik pisisutut unnerluunneqassasoq, Sebastian Leonhard Bech ilisimatitsivoq.

- Angerlarsimaffimmut kikkut isertinnissaanut malitsigisassaannullu aamma akisussaaffeqartoqarpoq. Inuillu taama annertutigisunik imigassanik cigarettinillu eqqussaannik imeqataallunilu pujortaraanni, taava unioqqutitsinerusoq imminut oqarfigisoqarsinnaasariaqarpoq, ingammik piniarfiit tamarmik matoqqatillugit, Sebastian Leonhard Bech oqarpoq.

Ilulisani politiit aammattaaq innuttaasoq eqeersimaartoq takunnittorlu, eqqortuliorluni politiinut saaffiginnittoq nersualaarpaat.

- Inuiaqatigiit tamarmik suleqatigiikkaangamik, pinerluttuliorneq taamatut pitsaanerpaamik akiorneqartartoq uuma suliap takutippaa, pinerluttuliortullu pissusaat akuersaarneqarsinnaanngitsoq takutillugu, Ilulissani politiit taama oqariartuuteqarput.

Powered by Labrador CMS