Ilulissat Siumut: Vittus aamma Kim namminiilivinnissamut suleqatigiissapput

- Namminiilivinnissamut suliniuteqarneq sukkanerusumik ingerlasariaqarpoq.

Siumup Ilulissani immikkoortoqarfiani siulittaasoq taama oqarpoq.

Immikkoortoqarfiup upernaaq Kim Kielsen isornartorsiorpaa, tassani naalakkersuisoqatigiit anguniakkatik piviusunngortinnissaannut kigaappallaamik ingerlanerarlugit isornartorsiuipput.

- Qaammatini tulliuttuni allanngortoqanngippat, Siumup siulittaasua Kim Kielsen partiimi siulittaasuuginnarnissaa ilimananngitsorujussuuvoq, Bernhardt Olsen upernaaq ilaatigut taama oqarpoq.

Aamma atuaruk: Immikkoortoqarfik: Piviusunngortitsisinnaannginneq Kim Kielsenip siulittaasuuneranik akeqarsinnaavoq

Kim Kielsenimut isornartorsiorneq attakkaa
- Ilulissat Siumut Kim Kielsenimut isornartorsiuineq attatiinnarpaa?

- Kim Kielsenip namminersulivinnissamut apeqqut kigaatsuararsuarmik sooq tiguneraa tupaallaatiginngilara. Vittus Qujaukitsoq illuanik apeqqummi sapiissuseqarnermik takutitsivoq, tamannalu isumaqatigaarput. Isumarput allanngortinngilarput, Berhard Olsen Sermitsiaq.AG-mut oqarpoq.

Kisianni Kim Kielsenip aamma Vittus Qujaukitsup akornanni qaninnerusumik suleqatigiinnermik pilersitsisoqarnissaa, Ilulissani immikkoortoqarfimmit neriuutigineqarpoq.

- Siumut toqqissisimanermik pisariaqartitsivoq. Taamaammat taakku akornanni qaninnerusumik suleqatigiittoqanngippat partiimut ajorluinnassaaq. Tassami tamanna pisariaqartipparput, Bernhard Olsen erseqqissaavoq.

Sulineq arriippallaartoq
Nuna tamakkerlugu ataatsimeersuarnermi namminiilivinnissamut apeqqut sammisat pingaarnersarigaat, Bernhardt Olsen oqarpoq.

- Namminiilivinnissamut sulineq arriippallaarpoq. Maanna ilungersorluta anguniagarput anguniartariaqarput. Oqaatsit pillugit oqallinnerit naammatsippugut. Maanna oqallinerup pitsaassusaa kivillugu namminiilivinnissamut sulineq aalluttariaqarparput. Tassani Kim Kielsen aamma Vittus Qujaukitsoq pingaarutilimmik inissisimapput, Bernhardt Olsen oqarpoq.