Ilulissat

Ilulissat: Pujortaguttoq aalakoorluni aallaaserluni ujajaariaraluartoq

Aallaat imalik sakkugalugu angutip aalakoortorujussuup Ilulissani Hotel Hvide Falki arfinngornermi ullaap tungaani ujajaariarfigigaluarpaa - ujajaaniutigisaralui cigariutsipput

Angut 23-nik ukiulik Qaasuitsup Eqqartuussivianit ulluni 25-ni tigummigallagassanngortinneqarpoq Ilulissani Hotel Hvide Falkimut ujajaariaraluareernermi kingorna.

Angut, arfininngornermi ullaap tungaani ujajaariaraluarnermi nalaani aalakoortorujussuusimasoq, aallaat 22 - 250-erisoq hotelimi saaffiginnittarfiup sulisuata saani imassaanik immersinnarlugu saaffiginnittarfimmi sulisoq ummiullugu cigaretsinik ujajaariarsimagaluarpoq.

Taama Qaasuitsup Politiit pisortarigallagaat Kasper Berthelsen Sermitsiaq.AG-mut oqaluttuarpoq.

Ilulissani politiit arfininngornermi ullaap tungaani qulinut tanneq qulingiluanngortoq Hotel Hvide Falkimit kalerrinneqarput angut aalakoortorujussuaq kaliber 22-250-mik sakkulisaartumik iserfigineqarsimasoq.

Sulisoq annilaaqqaqisoq
- Angutip hotelimut iseriitsiarnermi kingorna aallaat saaffiginnittarfiup sulisuata saavani imassaanik immersimavaa, immereeramiullu saaffiginnittarfimmi sulisoq annilaangaqisoq umerlugu cigaretsinik tunineqarnissani piumasarisimagaluarlugu, Kasper Berthelsen Sermitsiaq.AG-mut oqaluttuarpoq.

Kisianni saaffiginnittarfimmi sulisoq inimut allamut qimaasimavoq, tassanngaanniillu politiinut kalerriisimalluni.

Kasper Berthelsenip oqaluttuarnera najoqqutaralugu angutip aalakoortorujussuup politiit takkunneranni aallaasini natermut ilereersimavaa.

- Tigusarinninneq pisoqarfiunngitsumik ingerlanneqarpoq, Kasper Berthelsen oqarpoq.

Angut inatsit tunngaviusoq toqqammavigalugu sapaammi killisiorneqareerluni ulluni 25-ni tigummigallagassanngortinneqarpoq.

- Maanna susoqarpiarsimanersoq misissortussanngorparput, Kasper Berthelsen Sermitsiaq.AG-mut oqaluttuarpoq.

Powered by Labrador CMS